Македонската репрезентација тоне на ФИФА листата

Поразите во пријателските натпревари од Шведска и Норвешка ја чинеа фудбалската репрезентација на Македонија 14 места на ФИФА листата. Светската куќа на фудбалот, во четвртокот ја објави најновата листа, на која македонската репрезентација се наоѓа на 92-то место.

Македонија на почетокот на јуни одигра пријателски средби со Шведска во Малме и Норвешка во Осло и на двете средби избраниците на Чеде Јаневски забележаа порази (0-1, 0-2).

Што се однесува до репрезентациите кои и‘ се противници на Македонија во квалификациите за Светското првенство, највисок рејтинг има Хрватска, која бележи пад од четири места и се наоѓа на осмата позиција. Белгија влезе во Топ 10 на листата, откако забележа скок од две места, Србија назадуваше пет позиции и се наоѓа на 41-то место, Велс е на 46-та позиција, додека Шкотска, благодарение на победата над Хрватска во Загреб напредуваше 24 позиции и се наоѓа на 50-то место на ФИФА листата.

Инаку на врвот на листата и понатаму е Шпанија, пред Германија, Колумбија, Аргентина, Холандија, Италија, Португалија и Хрватска. Бразил, по подолго време се врати во Топ 10 на светскиот фудбал, ’кариоките’ со освојувањето на Купот на Конфедерации направи скок од 13 места и се наоѓа на деветтото место, додека Топ 10 завршува со Белгија.