Малите акционери критикуваат, на менаџерите не им фали “влакно од глава“

Јирген Шремп, шеф на автомобилскиот концерн ДајмлерКрајслер, доби од Надзорниот одбор продолжение на договорот до 2008-ма година, но мораше со часови да слуша тешки зборови на негова адреса и барања да поднесе оставка, упатени од малите акционери. Многумина на крајот при гласањето не им дадоа поддршка на Управниот и на Надзорниот одбор. Дури и еден од големите акционери – "Дека Фондс Гезелшафт" им се придружи во тоа настапувајќи отворено против шефот на Управниот одбор Јирген Шремп и Претседателот на Надзорниот одбор Хилмар Копер.

“Ние полагаме врз сигналното дејство и тоа овде е многу силно примено на знаење; даваме видлив сигнал дека сме активни и на менаџментот му порачуваме дека веќе нема да гласаме во смисла на ставовите на управата, ако имаме причина за незадоволство од неа” – рече Михаел Шнајдер, менаџер на "Дека", друштво на фондовите со акции на германските штедилници.

Чекорот на "Дека" посебно ги израдува заштитниците на акционерите: “Тоа покажува дека расте притисокот врз ’мрежата на старите момци‘ и врз договарањата меѓу Управниот и Надзорниот одбор” – оцени Јерг Плута од Германското здружение за заштита на поседот на хартии од вредност. Додека тој се надева на подобра акционерска култура во Германија, акционерите се скептични:

“Бизниз ес јужл, вообичаена работа. На Шремп сепак ќе му биде продолжен договорот и се знае дека наредната година повторно мора да смета на малку критика”.

И навистина, Надзорниот одбор се покажа неимпресиониран од слабиот деловен резултат. Непосредно по завршувањето на Главното собрание на акционерите, му беше продолжен договорот на Шремп за наредните 4 години. Претходно уште поостро критикуваниот Надзорен одбор го потврди и Хилмар Копер, поранешен шеф на Дојче Банк, на функцијата претседател на тоа тело до 2007-ма година.