Мерки за олеснување на товарниот сообраќај на Балканот

Министрите за сообраќај на 10 земји членки на СЕЦИ минатава недела на средбата во Софија потпишаа меморандум за воведување заеднички цертификат за тежината на товарните возила. Станува збор за изедначување на мерните процедури, со што ќе се одбегнат големите колони на границите во земјите од Југоисточна Европа, како и корупцијата кај цариниците. Според спогодбата што ја потпишаа надлежните министри, националните Здруженија на приватните превозници од крајот на 2004. ќе издаваат цертификати за меѓународниот транспорт и ќе гарантираат за пратките. Конечните варијанти на постапката треба да бидат договорени на национално ниво до следната средба на СЕЦИПРО закажана за јуни. Во тој случај мерките за олеснување на регионалниот транспорт би можеле да се применуваат од крајот на годината. Вице-претседателот на Бугарската индустриска и трговска комора Георги Чернев потсети дека регионалната трговска размена во ЈИЕ изнесува само 8 до 10% од вкупниот обем на размената на земјите од овој регион. Тоа е многу малку во споредба со меѓународните искуства. Затоа владите треба сега да манифестираат политичка волја за реализирање на проектот со транспортните сертификати, нагласи Чернев. Координаторот на Пактот за стабилност Ерхард Бусек, пак, побара поврзување на бројните политички иницијативи со активности на приватните претпријатија. Тој се пожали и што се' уште не се реализиера планираната слободна трговска зона, бидејќи дел од земјите потписнички не се придржуваат до преземените обврскит и продолжуваат да ги штитат домашните производи со протекционистички мерки.