Над 500 лица исчезнати во поплавите во Колорадо
15 септември 2013Над 500 лица се прогласени за исчезнати во американската држава Колорадо, каде поплавите предизвикани од поројните дождови, однесоа најмалку пет жртви. Последната регистрирана жртва е жена, однесена од течението на реката во градот Боулдер, соопштија локалните власти. Во четвртокот во градот беа откриени тела на тројца загинати, а во петокот - на четвртото загинато лице.
Во државата Колорадо е прогласена вонредна состојба, а метеоролошките служби прогнозираат дека дождовите ќе продолжат и во наредните неколку денови, што го отежнува пристапот на спасувачките служби до најизолираните реони. Спасувачките екипи ги предупредуваат локалните жители дека ќе мораат да бидат подготвени на повеќе недели без струја, питка вода и основни потреби.
Тоа особено се однесува на граѓаните кои се не расположени да се евакуираат и покрај апелите од властите.
Службите за цивилна заштита располагаат со поддршка на спасувачките екипи од доброволци и воздушен транспорт.
Снимките направени од хеликоптер, покажуваат дека градовите Џејмстаун, Лајонс и Лонгмонт се претвориле во острови. Многу села во планинските реони на запад се целосно изолирани и без вода за пиење.
Полицијата стравува дека бројот на жртвите ќе биде повисок откако ќе се повлече надојдената вода.
Американскиот претседател Барак Обама потпиша указ за прогласување на состојба на елементарна непогода во Колорадо и нареди да се обезбеди сојузна помош.