На ред е економијата

Барак Обама бара брзо донесување на конјуктурната програма која во наредните години треба да обезбеди отворање на околу 4 милиони нови работни места. Тој врши притисок врз конгресмените, но отворено признава дека во Конгресот има отпор кон пакетот конјуктурни мерки, тежок 825 милијарди долари.

„Мора да признаам дека се‘ уште има разлики меѓу владата и членовите на Конгресот околу одделни точки од програмата“, изјави американскиот претседател во Вашингтон. Обама има намера да го „протурка“ пакетот мерки во Конгресот до средината на февруари, зашто, како што рече: „Секој нов ден става поголем акцент врз проблемите што ги имаме, не само во однос на губењето работни места, туку и во однос на нестабилноста на финансискиот систем. Затоа сите мора да преземат чекори што е можно побргу за да се донесе овој пакет за опоравување на економијата кој ќе донесе три до четири милиони нови работни места.“

Републиканците критикуваат дека пакетот на Обама е „прескап“

Конгресмените од редовите на републиканците, пак, на средбата со американскиот претседател, презентирале свои идеи за конјуктурен пакет во кој се предвидени намалување на даноците за работниците и олеснувања за малите претпријатија. Портпаролот на републиканците во Конгресот, Џон Бенер, по средбата во Вашингтон изјави дека пакетот мерки на Обама е „прескап“ и ќе биде „потребно премногу време за да биде спроведен“.

Концептот на Обама предвидува 550 милијарди долари за државни издатоци и намалување на даноците во висина од 275 милијарди долари.