Нова програма за штедење и нови штрајкови во Грција

Во пресрет на разговорите на претставниците на меѓународната „тројка“ со грчкиот министер за финансии Јанис Стурнарас за натамошна исплата на финансиската помош за Грција илјадници луѓе протестираа против мерките за штедење на владата. Демонстрациите во Солун, кои на почетокот беа мирни, беа засенети од нередите, кои ги предизвикаа група автономи. На протестите повикаа повеќе грчки синдикати како и левичарскиот сојуз Сириза.

Претставници на Европската централна банка, Меѓународниот монетарен фонд и Европската унија од петокот престојуваат во Грција, за да проверат дали Грција ги исполнува условите за исплата на следната транша финансиска помош во висина од 31,5 милијарди евра. Нивниот извештај се очекува на почетокот на октомври. Според грчките медиуми можно е меѓународната „тројка“ да побара натамошни промени во плановите за штедење. Тие јавуваат дека според проценките на меѓународните експерти недостасувале заштеди во висина од дополнителни две милијарди евра.

Вечерва премиерот на Грција Андонис Самарас има намера да оддржи средба, за да го отвори патот за најавените мерки за штедење во опсег од 11,5 милијарди евра во 2013 и 2014 година. Според информации од грчкото Министерство за финансии, оваа програма би требало да биде усвоена најдоцна до петок следната недела.

Утре премиерот Самарас лично треба да се сретне со делегацијата доверители. Грчкиот премиер Самарас во петокот ги повика меѓународните доверители брзо да ја исплатат следната транша за високо задолжената земја, а од своите сограѓани побара да ја поддржат програмата за штедење и им вети дека ова се последни мерки за штедење.