Нов удар за Ал Каеда

Советникот за безбедност на американскиот претседател Барак Обама, Џон Бренон оцени дека смртта на осомничениот терорирст Фазул Абдула Мохамед, е нов удар за терористичката мрежа Ал Каеда. Американската министерка за надворешни работи Хилари Клинтон исто така смета дека ова е силен удар за Ал Каеда како и нејзините сојузници, терористички групации и нивните акции во Источна Африка. „Тоа е праведен крај за еден терорист, кој уби голем број невини лица и нанесе голема болка“, изјави Клинтон, во Танзанија.

Фазул Абдула Мохамед стоеше високо на листата на најбарани терористи на американската тајна служба ФБИ. Се претпоставува дека тој раководел со планирањето на акциите за нападите врз американските амбасади во Наироби и Даресалам, кога во 1998 година животот го загубија 224 луѓе.

Фазул Абдула Мохамед најверојатно е убиен пред повеќе денови. Минатиот вторник сомалиските безбедносни служби при контрола пронашле пиштол во едно возило по што дошло до престрелка во која бил убиен и Фазул Абдула Мохамед. Неговиот идентитет меѓутоа беше откриен подоцна, откако Абдула Мохамед веќе бил погребан. Откако властите добиле информации, била извршена ДНК анализа, која го потврдила идентитетот на Фазул Абдула Мохамед. За него САД имаа распишано награда од пет милиони долари.

Автор: Рудигер Паулерт/ АТ/ дв

Редактор: Симе Недевски