Обама сака поинаков свет
24 септември 2009
„Дојде време светот да почне да се движи во нова насока“, рече американскиот претседател пред делегатите во Њујорк.
„Мора да почнеме нова ера на ангажман заснован на заеднички интерес и заемна почит. Нашата работа мора да почне сега!“
САД, според Обама, се подготвени да преземат водство, но да дејствуваат треба сите. „Исто како што ниту една земја не може да се изолира од светот, не може ниту која било земја, се‘ едно колку е голема и моќна, сама да одговори на предизвиците“, рече Обама, нагласувајќи:
„Со зборови и дела баравме нова ера на ангажирање со светот и сега е време за сите нас да ја поделиме одговорноста за да дадеме глобален одговор на глобалните предизвици.“
Заложбата на Обама доби пофалби
Шведскиот премиер и актуелен претседавач на ЕУ, Фредерик Рајнфелд ја поздрави волјата на САД повторно да се анагжираат повеќе во меѓународните организации. „Тоа ја отвора вратата за нова ера на меѓународна соработка, која ветува многу“, рече Рајнфелд.
За потесна соработка се заложи и генералниот секретар на ОН Бан Ки Мун, особено со оглед на предизвиците како гладот, енергетската криза и рецесијата во светот.
Реформа на Советот за безбедност
Првиот ден на генералната дебата на ОН донесе и свеж ветер во дискусијата околу реформата на Советот за безбедност. Францускиот претседател, Никола Саркози побара постојано место за Африка, но и за Јужна Америка, Индина, Јапонија и Германија. „Од оваа реформа зависи легитимитетот на ОН“, рече тој. Италијанскиот премиер Силиво Берлускони, пак предупреди од опасноста од приширување на бројот на членките, зашто како што рече, на тој начин само ќе се засили чувството кај другите земји дека се исклучени.
Скандал на свој начин, во дебатата предизвика и либискиот лидер, Моамер Ел Гадафи. Тој остро ги нападна ОН и го обвини Советот за безбедност дека казнува беспомошни земји со резолуции и на тој начин им остава печат на „нации од втор ред“. „Не треба да се вика Совет за безбедност, туку „Совет за терор“, рече возбудениот Гадафи кој зборуваше цели час и половина.
Автор: ЕМФ/АТ/дв
Редактор: Жана Ацеска