1. Прескокни до содржината
  2. Прескокни до главната навигација
  3. Кон други страници на DW

Однесувањето на Гутенберг е срам за Германија

24 февруари 2011

Германскиот министер за одбрана Карл Теодор цу Гутенберг не сака да даде оставка, и покрај аферата со неговата докторска дисертација. Тоа е срамота за политичката култура во Германија.

https://p.dw.com/p/10OhC

Еден министер, за кого се докажа дека лажел, мамел, дека се кител со докторска титула преку плагијат, не може да остане на функцијата. Срамота е што германскиот парламент цел ден мораше да се занимава со плагијатот на еден министер, кој арогантно, со помош на весникот „Билд“, отфрла секаква одговорност. Уште посрамотно е што овој министер ја има поддршката на канцеларката и пратениците на владејачката коалиција.

Факт е дека Карл Теодор цу Гутенберг лажел. Тврдеше дека низ седумгодишна напорна работа, самиот ја напишал дисертацијата, според своите знаења и совест. Сите обвинувања дека препишувал, ги отфрли како апсурдни. Дури кога доказите за плагијат во докторската работа и во биографијата се намножија, се одлучи на организирано повлекување. Соопшти дека ќе се откаже од докторската титула. Навистина чудно сфаќање на правото на еден правник? Академската титула не може туку-така да се врати, а особено не на ваков начин, спречувајќи темелна истрага за оправданоста на критиките, што му беше намерата. Но, тоа не му успеа.

Deutschland Bundestag zu Plagiats-Affäre Karl-Theodor zu Guttenberg
„Mинистерот е разоткриен како плагијатор, уште повеќе, како лажго и хохштаплер!“Фотографија: picture alliance/dpa

Универзитетот извршил проверка на препишуваните делови и му ја одзеде академската титула-доктор на науки. Професорите не навлегувале во обвинувањата дали во прашање е смислена измама. Но, доволен е резултатот: министерот е разоткриен како плагијатор, уште повеќе, како лажго и хохштаплер. Тој не може долго да остане на функцијата, без разлика на неговиот шарм и политичкиот талент. Овде не се работи за ситници, за немарност и изоставени наводници и фусноти. Овде се работи за смислена лага и измама, за недоволно почитување на законот и недостиг на веродостојност. Конечно, во прашање е и добриот глас на германската наука и на сите оние кои со навистина напорна и долгогодишна работа ги напишале своите докторски дисертации, без зад себе да имаат фамилија со милионски имот, кои дури мораат да го одложат и формирањето свое семејство. Се работи за достоинството на оние млади научници, кои за својата научна кариера мораат да платат скапа цена, живеејќи во речиси човечки недостоинствени услови и работејќи во економска несигурност на германските универзитети, осакатени преку неолибералните реформи.

Штета е што сето отиде толку далеку и што се компромитираше еден несомнено надарен млад политичар. Но ако Карл Теодор цу Гутенберг остане на функцијата, политичката култура во Германија би била трајно оштетена.

Коментар: Бетина Маркс

Превод: Жана Ацеска