ОН за итно заминување на јеменскиот претседател

Едногласно усвоената резолуција „остро ги осудува смртоносните владини напади врз демонстрантите и го поддржува мировниот план на Советот за заливска соработка, по кој Салех ќе го заврши своето 33-годишно управување со земјата“.

Ова е прва резолуција за Јемен од почетокот на масовните протести во јануари годинава, во кои загинаа неколку стотици луѓе.

Совет за безбедност го повика Салех да го одржи ветувањето и веднаш да го потпише договорот за мирно предавање на власта, „без одложување“ и да го прекине насилството во земјата.

Салех претходно изјави дека се согласува со планот на шесте заливски земји, но одби да го потпише и да спроведе било која точка од овој документ.

Со синоќешната резолуција остро се осудува постојаното кршење на човековите права од страна на јеменските власти, како што е прекумерната употреба на сила против мирните демонстранти. Изразена е и сериозна загриженост поради влошувањето на безбедносната ситуација и влошувањето на економската и хуманитарната ситуација во Јемен поради „недостаток на напредок во политичкото решение и можно ескалирање на насилството“.

Мнозинството граѓани на Јемен го обвинуваат Салех дека ја турка земјата во граѓанска војна.

САД веднаш реагираа по донесувањето на резолуцијата на СБ на ОН, настојувајќи Салех „итно“ да се повлече од функцијата.

„Меѓународната заедница испрати јасна и единствена порака“, изјави портпаролот на Стејт департментот Марк Тоунер, оценувајчи на оваа резолуција како „важна етапа“ кон решавањето на кризата во Јемен.

Автор: ЖА/СН/миа

Редактор: Симе Недевски