Орден за заслуги за Тоше Проески

Орденот на Тоше Проески, како беше соопштено од кабинетот на претседателот Ѓорге Иванов, се доделува поради високите дострели во неговата професионалната музичка дејност, како и неговите активности на хуманитарен план. „Со ова, Тодор Проески даде исклучителен придонес за афирмација на Република Македонија во светот“, се вели во соопштението од претседателскиот кабинет.

Проески е роден на 25-ти јануари 1981 година. Во неговата музичка кариера останаа забележани настапот на Евровизија 2004 со песната „Ангел си ти“, победата на Беовизија во 2003-та со „Чија си“, прво место на „Славјански Базар“ во 2000-та година со „Тајно моја“, како и гранд-при наградата на Хрватскиот радиски фестивал со песната „Вежи ме за себе" (Врзи ме за себе) во 2007-ма година.

Зад себе Проески ги остави и албумите „Некаде во ноќта“, „Синот Божји“, „Ако ме погледнеш во очи“, „Ден за нас“, „По тебе“, „Божилак“ и „Игри без граници“.

Тоше Проески загина утрото на 16-ти октомври 2007-ма година во тешка сообраќајна несреќа што се случи на автопатот Загреб – Липовац, во близина на Нова Градишка, Хрватска. Владата го прогласи Проески за Заслужен граѓанин на Македонија, а денот на погребот, 17-ти октомври, беше прогласен за Ден на национална жалост.

Постхумно се објавени албумите „The hardest thing“ (Најтешкото нешто) и „Још увек сањам да смо заједно“ (Се’ уште сонувам дека сме заедно).

Автор: СН/ АТ/ макфакс

Редактор: Александра Трајковска