1. Прескокни до содржината
  2. Прескокни до главната навигација
  3. Кон други страници на DW

Папаконстантину под истрага

ЕМФ/миа/дпа2 јануари 2013

Грчката влада побара спроведување истрага за поранешниот министер за финансии Јоргос Папаконстантину и тој да биде изведен пред суд поради фалсификување јавен документ и неисполнување на службена должност.

https://p.dw.com/p/17C8K
Фотографија: picture alliance / dpa

Грчкиот парламент со тајно гласање во текот на наредните две недели треба да одлучи дали против Јоргос Папаконстантину ќе биде поведена истрага од страна на посебна комисија. За да се формира истражна комисија се потребни 151 гласа од вкупно 300 пратеници колку што брои парламентот.

Јоргос Папаконстантину, кој беше дел од владата на социјалистите на ПАСОК, е осомничен дека ги извадил имињата на тројца свои роднини од „Лагард листата“.

Грчките власти го добија најновиот список минатата недела, откако се појавија сомнежи дека претходната листа, која тогашната француска министерка за финансии Кристин Лагард му ја дала на нејзиниот колега Папаконстантину, била преправана. Списокот содржи имиња на Грци кои имаат сметки во филијалата на ХСБЦ банката во Женева и ќе бидат под истрага за евентуално затајување данок.

На Папаконстантину, по евентуалното укинување на имунитетот, му се заканува казна затвор во траење до 20 години, објаснуваат правници во Атина. ПАСОК го поддржа предлогот за покренување обвинение против него и веќе го исклучи од партијата.

Папаконстантитну пак, се спротивстави на обвинувањата и за грчките медиуми изјави дека се работи за „заговор“ против него.