Папандреу ги изврши неопходните кадровски промени во владата

Грчкиот премиер Јоргос Папандреу го именуваше досегашниот министер за одбрана Евангелос Венизелос за вице-премиер и министер за финансии, како дел од реконструкцијата на кабинетот.

Венизелос едновреме беше најголем ривал на Папандреу за лидерската функција во ПАСОК откако оваа партија ги загуби изборите во 2007 година.

Досегашниот министер на финансии, Јоргос Папаконстантину, кој беше творец на спорната програма за штедење ќе стане министер за животна средина.

Да се обезбеди поддршка за програмата за штедење

Промени има и во ресорот надворешни работи. На местото на Димитрис Друцас доаѓа европарламентарецот Ставрос Ламбринидис.

За министер за одбрана пак е именуван Панос Бедлитис. Новата влада треба да поднесе заклетва подоцна во текот на денот, а во вторник треба да и‘ биде изгласана доверба во грчкиот парламент.

Папандреу се обидува со промените во владата, која е соочи со отпори од опозицијата, синдикатите и од сопствените редови, да обезбеди поддршка во парламентот за својата спорна програма за штедење.

Владата предложи да се намалат платите, да се зголемат даноците, да се намали бројот на вработени и да се приватизираат јавните компании. На тој начин оваа година треба да се заштедат над шест милијарди евра, што е предуслов да се добие нов кредит од ММФ и европските финансиски институции.

Автор:СН/ ЖА/миа/макфакс/ртр

Редактор: Симе Недевски