Пари за талибанските борци да се откажат од борби

Германскиот вице-канцелар Гидо Вестервеле за весникот „Билд ам Зонтаг“ ја образложи програмата за помош на радикалните талибанци кои ќе се откажат од терористички и бунтовнички активности. „Меѓу талибанските терористи постојат многу членови кои на погрешниот пат не стигнале од фанатично убедување, туку од економски причини“, смета Вестервеле и додава: „ На овие луѓе сакаме да им понудиме стопанска и социјална перспектива за нив и нивните семејства. За таа цел ќе употребиме дополнителни средства.“

Министерот за надворешни работи Гидо Вестервеле, кој ќе ја застапува Германија на Лондонската конференција за Авганистан, дополнува дека на неа ќе биде понуден нов поттик за повторно вклучување на бунтовниците во општеството.

Промена на стратегијата на Бундесверот

Германскиот министер за одбрана Карл-Теодор цу Гутенберг, пак, најави промена на стратегијата на Бундесверот во Авганистан. За утрешното издание на „Франкфуртер алгемајнецајтунг“ тој изјави дека војниците ќе треба да покажат поголемо широко присуство, не во офанзивни борби, туку за да ја доведат во склад обуката на авганистанската армија и полиција и заштитата на авганистанското население. Гутенберг подвлече дека не се работи за преземање на американскиот концепт под име „Партнерство“. Според весникот, кој се повикува на изјавата на Гутенберг, меѓународните трупи патролираат, се борат и живеат надвор од обезбедените воени бази, рамо до рамо со авганистанските сили за безбедност, што крие значителни опасности.

Заштитата на народот би била главната цел на германскиот ангажман, објаснува Гутенберг, а тоа според него е можно ако се прави таму каде постои директен контакт со населението. Во некои делови на Авганистан моделот се покажа како успешен и не значи автоматски поголем ризик за војниците. Гутенберг сака уште пред почетокот на конферeнцијата за Авганистан во Лондон да наведе конкретна бројка за зголемување на германските трупи во земјата. Но, таа сепак е во зависност од резултатите на конференцијата.

Карзаи има план за „мир по секоја цена“

Авганистанскиот претседател Хамид Карзаи, пак, пред конференцијата изјави дека на неа ќе излезе со посебен план. Не се работи за поголем број странски војници или помош во обновата:

„Ние како авганистански народ знаеме дека ни‘ треба мир, по секоја цена.“

Карзаи планира повторна интеграција во земјата на талибанците кои не извршиле терористички напади и немале врски со Ал Каеда. За разлика од поранешните најави за национално помирување, според Карзаи, сега зад намерата се наоѓа и план за акција поткрепен со пари.

Во меѓувреме, парламентарните избори во Авганистан се одложени за четири месеци. Првично беше предвиден термин на 22 мај, а сега се вели дека изборите ќе се одржат на 18 септември. Изборната комисија одлуката ја образложи главно со недостаток финансиски средства.

Автор: ЖА/ЕМФ/апн/дпа/афп/дв