1. Прескокни до содржината
  2. Прескокни до главната навигација
  3. Кон други страници на DW

Партиски секретар како нарко-бос

Рут Кирхнер (ард) / Елизабета М. Фиданоска4 јануари 2014

Полицијата во јужна Кина во голема рација во едно крајбрежно село запленети три тони од дрогата Кристал мет. Секое петто домаќинство учествувало во трговија со дрога, а шеф на картелот наводно е партиски секретар.

https://p.dw.com/p/1AlE6
Фотографија: Reuters

Сцените прикажани на кинеската државна телевизија наликуваа на акционен филм. Специјални единици ноќе, проследени само со светло од рачни лампи, упаѓаа во куќи, а непосредно потоа на подовите лежеа луѓе облечени само во долна облека. Во Боше, во јужната кинеска провинција Гуангдонг, во акција беа 3.000 полицајци и припадници на паравоени единици, поддржани од хеликоптери. Глисери на морнарицата патролираа пред брегот за да оневозможат евентуално бегство по воден пат.

Riesen Drogen-Razzia in China
Фотографија: Reuters

Уапсени се речиси 200 луѓе, меѓу кои и повеќемина партиски функционери. Запленети се три тони од дизајнерската дрога Кристал мет, како и 23 тони суровини, јави кинеската државна агенција Ксинхуа. Секое петто домаќинство во селото учествувало дриектно во производство на дрога или имало интерес од продажбата на дрогата.

Селото со години лиферувало дизајнерска дрога во цела Кина. Една третина од дрогата Кристал мет продадена ширум Кина потекнувала од селото Боше, наведуваат властите. И уште полошо - селаните биле под заштита на локалните службеници и полицајци, изјави заменикот шеф за безбедност на провинцијата, Гуо Шаобо.

Нарко-бос на картелот наводно бил токму партискиот секретар од селото, кој со години го штител Боше од интервенција на властите. За таа цел тој поткупувал локални функционери. Освен тоа, селаните во минатото им се заканувале на полицајците, ги блокирале тесните улички со мотоцикли и ги терале припадниците на безбедносните сили на бегство.

Riesen Drogen-Razzia in China
Фотографија: Reuters

Затоа големата рација сега е изведена под заштита на ноќта. За да се оди на сигурно, властите претходно го пресекле доводот на струја во селото. Освен тоа, информацијата за рацијата е обелоденета дури неколку дена по успешното завршување на акцијата.