1. Прескокни до содржината
  2. Прескокни до главната навигација
  3. Кон други страници на DW

Понта сепак доби мандат да формира влада

ЖА/миа17 декември 2012

На општо изненадување, и покрај меѓусебниот спор, романскиот претседател Трајан Басеску му даде мандат на лидерот на социјалдемократите Виктор Понта да формира влада на Романија.

https://p.dw.com/p/173q4
Фотографија: Reuters

По денешните получасовни консултации со парламентарните партии романскиот претседател Трајан Басеску го номинира претседателот на Социјалдемократската партија Виктор Понта за премиер на земјата, соопштија романските медиуми.

Според извори кои учествувале на средбата, Понта бил единствениот предлог понуден на консултациите, соопшти Аџерпрес.

Освен од социјалдемократите, неговата кандидатура, исто така, била поддржана и од Национално-либералната партија, Конзервативната партија, Националниот сојуз за прогрес на Романија и од групата на националните малцинства.

Демократско-либералната партија, Граѓанска сила, Демократскиот сојуз на Унгарци во Романија и Партијата на народот - Дан Даконеску не понудиле свои предлози за премиер.

Социјал-либералниот сојуз, што ги обединува социјалдемократите, либералите и конзервативците, освои околу 60 проценти од гласовите на парламентарните избори на 9 декември, но прашањето за номинацијата на премиер стоеше отворено, затоа што Басеску повеќе пати имаше изјавено дека никогаш повеќе нема да му ја предложи премиерската функција на Понта.

Во текот на летото владата, предводена од Понта, имаше неуспешен обид да го отстрани Басеску од должноста.