Поради европската криза се‘ повеќе доселеници во Германија

Во текот на изминатата година во Германија се доселиле 958.000 луѓе, или 160.000 повеќе отколку во годината претходно, соопшти денеска (16.05) Сојузниот завод за статистика. Најмногу доселеници има од земјите на Европската унија. Од ЕУ во текот на 2011-та дошле 138.000 доселеници повеќе отколку во 2010-та. Тоа е зголемување за 34 проценти. Притоа, најмногу доселеници има од европските земји во криза. Од Грција дошле дури 90 проценти повеќе луѓе отколку во 2010-та година, а од Шпанија 52 проценти повеќе.

Од земјите кои во 2004 година и‘ се приклучија на ЕУ, во изминатата година дошле 75.000 луѓе повеќе отколку во годината пред тоа, или 43 проценти повеќе. Статистичарите оценуваат дека зголемувањето се должи на тоа што во мај 2011 година паднаа и последните ограничувања за овие граѓани на пазарот на работна сила во Германија. Најголемо зголемување бележи бројот на доселеници од Полска (плус 49.000) и Унгарија (плус 12.000).

Од останатите европски држави, кои не се дел од ЕУ, бројот на доселеници е само малку зголемен. Доселувањето од Азија е зголемено за 11 проценти, од Америка за десет проценти, а од Африка за само еден процент. Речиси две третини од странските доселеници се доселиле во германските покраини Северна Рајна Вестфалија, Баварија, Баден Виртемберг и Хесен.

Што се однесува до луѓето што ја напуштиле Германија, во 2011 година бројот се зголемил за осум илјади во споредба со 2010-та. Имено, земјата ја напуштиле 539.000 странци и околу 140.000 Германци.