Преку оперите на Вагнер до нова љубов
20 јуни 2013
Рихард Вагнер - светот на музиката периодов се врти околу него, а еуфоријата стигнува се‘ до Липерланд, на западот од Германија. Барнтруп - гратче со 9000 жители. Овде се‘ си има свој тек и не се случува речиси ништо.
Но, овде има обожаватели на Вагнер, како на пример - Карл-Вилхелм Валтер. Електромашинскиот инженер е на пат кон театарот Детмолд.
Треба да вози само 20 минути за да го доживее Вагнеровиот монументален циклус „Прстенот на Нибелунзите“.
„Пред неколку години театарот Детмолд почна со инсценирање на ’Прстенот’, а со оглед што тој се наоѓа близу моето место на живеење одам на многу претстави во Детмолд. Имав можност повеќе пати да го слушнам целиот ’Прстен’ и навистина да го запознаам. Оттогаш сум голем почитувач на Вагнер“, вели Карл-Вилхелм Валтер.
Со оглед на тоа што Валтер по неколку пати присуствувал на голем број претстави, денес може да биде присутен на пробата за Вагнеровата опера „Тристан и Изолда“.
„Тристан и Изолда“ чезнеат за спасение од се‘ земско преку вечна љубов. Режисерот во провинција тоа треба да и‘ го доближи на широката публика - од професор до земјоделец. Кај Мецгер:
„Треба да се најде раскажувачка форма која ќе создаде мост до публиката за таа да може да се ориентира во комплексното дејство. Од друга страна, се разбира, има и табуа. Ако е премногу радикално, премногу депримирачки, премногу порнографски, тогаш публиката тоа сигурно нема да го сака.“
Театрите како во Детмолд се „ковачници“ на таленти за Вагнерови ѕвезди ширум светот. Јоана Конефал - Изолда - овде се кали. Нејзиниот глас се‘ уште не е доволно силен за таканаречените оперски куќи од А категорија, како Минхен или Цирих.
„Се разбира, на 29-годишна возраст никој нема да ме ангажира во А-опера за вакви големи улоги како Изолда и воопшто за главни улоги. Мора да се почне во опера од средна категорија, како Детмолд, па потоа да се напредува“, вели оперската пејачка која е во улога на Изолда.
Карл-Вилхелм Валтер е сведок на сето тоа и дури и на повеќе од тоа. Како постојан гостин во Детмолд еден ден почнал да флертува со Ерда од „Прстенот на Нибелунзите“. Сега тој и пејачката се пар. Приказна која би му се допаднала на Вагнер.