150611 Interkultureller Geschichtsunterricht
25 јуни 2011Како поддршка за наставниот кадар во Германија неодамна излезе од печат книгата „Културни конфликти - културни средби“, што со заеднички сили ја издадоа Здружението на германските наставници по историја, Сојузната централа за политичка наобразба и Фондацијата „Херберт Квант“. Оваа фондацијата веќе долги години се занимава со темата за „триалогот на културите“ и тоа меѓу еврејската, христијанската и муслиманската вера.
Претседателот на Сојузната централа за политичка наобразба, Томас Кригер, оценува дека со новата публикација се отвора нов простор на подрачјето на изучувањето на историјата.
„Интеркултурната историја во Германија е и понатаму неизорана нива и далеку е од тоа да стане тема во фокусот на јавноста. Ваквиот третман е во остра противречност со фактот дека во Германија, според статистичките податоци, веќе живеат околу 20% граѓани кои имаат странско потекло. Кај најмладата генерација под пет години, процентот изнесува дури 44%.“
Националната историја во фокусот
Со оглед на овие факти неприродно е што предметот по историја и во Германија, како и во повеќето други земји, останува сконцентриран на историјата на сопствената земја. Другите земји се спомнуваат само кога имаат директна или индиректна допирна точка со националната историја. Во вкупно 27 поглавја во новата публикација се обработуваат контактите и конфликтите меѓу евреите, христијаните и муслиманите од минатото па се’ до сегашноста. На тој начин учениците во мултикултурните одделенија во Германија можат да дознаат повеќе за сопствениот идентитет, но и за идентитетот на соучениците, со што би можело да се развие и повеќе почит и толеранција за другите култури и менталитети.
Мнозинството се странци
Во основното училиште „Виножито“ од предградието на Берлин, Нојкелн, мнозинството ученици се од негерманско потекло. Ајнур Булут е наставничка по веронаука и наизменично со колешката по христијанска веронаука им предава на учениците од трето и четврто одделение. Таа прво ги учи како се поздравува: „Кога ќе речам ’салам алејкјум’, тогаш на тоа се одговара со истиот поздрав. Тоа значи: мир со вас. Тоа е еден од исламските поздрави.“
Во ова училиште поголемиот дел од учениците муслимани никогаш порано немале контакт со деца од христијанско потекло. Дотолку е поинтересно што наставата по веронаука е наизменична.
Важна улога на учебниците
Тоа треба меѓутоа да се измени и во содржината на учебниците, смета Роланд Лефлер од Фондацијата Херберт Квант: „Еврејството често се набљудува од конфликтна перспектива, дали преку антисемитизмот или преку холокаустот или пак во поново време преку блиско-источниот конфликт. Истото тоа се случува и со исламот, преку историското ширење на исламот, потоа продирањето на Турците до портите на Европа, до Виена и на крајот повторно со блиско-источниот конфликт од поново време. Христијанството, пак, се набљудува како религија од времето на мрачниот среден век и не се прави подоцна разлика меѓу католичката и православните цркви, меѓу католиците и протестантите и другите, новоформирани цркви“, појаснува Роланд Лефлер од Фондацијата Херберт Квант.
Автор: Сабине Рипергер / Горан Чутаноски
Редактор: Александра Трајковска