Путин замина за да остане!

Путин додуша ја предаде претседателската функција, но без промена на уставот, како премиер, останува централна фигура во руската политика. Накусо: Путин замина, за да остане.

Централната порака од Путин и Медведев во последните месеци беше дека со ова ново двојно владеење во Русија – оваа „тандем демократија„ со Медведев како претседател и Путин како премиер, продолжува гаранцијата за политичката и економската стабилност на Русија. Обајцата неуморно повторуваа дека само на тој начин земјата може да се модернизира. Меѓутоа, токму во оваа теза за политичката стабилност со новата двојна власт Медведев – Путин, може да се искаже сомнеж.

Се поставува прашањето за готовноста на Медведев да му се потчини на премиерот Путин. Во моментов Медведев кон ова прашање се однесува многу дипломатски и воздржано, иако како претседател располага со широки надлежности. Како претседател тој е и врховен командант на руските воени сили и ги контролира таканаречените моќни министерства – армијата, полицијата и тајните служби.

Според уставот, Медведев има уште една силна позиција во однос на премиерот: може да го отпушти, како и кон парламентот: може да го распушти. Од друга страна, премиерот Путин со дво-третинското мнозинство на неговата партија „Единствена Русија„ во Думата, може да ги блокира претседателовите наредби и во случај на колебање, со промена на уставот во целост да го обезвласти претседателот.

На прв поглед, во новата двојна власт на претседателот Медведев и премиерот Путин може да се види посебна руска форма на контрола и баланс. Меѓутоа, основната грешка во новата политичка конструкција е во тоа што поделбата на власта не е во смислата на класична егзекутива, легислатива и судство, туку што предност добива нејасната поделба на власта во рамките на егзекутивата. Оттаму, за двојната власт ќе биде решавачко дали Медведев и Путин ќе расчистат кој е вистинскиот број еден во политичка Русија. И уште поважно - дали обајцата долгорочно ќе се придржуваат кон таквиот договор. Ако не, тогаш место постојаност и континуитет, побргу можат да се очекуваат несогласувања и политичка нестабилност.

Инго Мантојфел