Путин ја презеде функцијата

Владимир Путин при официјалното преземање на должноста, со што започна неговиот трет мандат на руски претседател, вети решавање на најсложените и најтешките прашања во земјата.

„Сакаме да живемее во демократска земја во која секој има слобода за примена на својот талент, работа и сила. Сакаме да живемее во успешна Русија, која се почитува во цел свет како доверлив, отворен, чесен и предвидлив партнер“, рече Путин по положувањето заклетва.

Тој истакна дека светот го видел „оживувањето“ на Русија и оти тоа е заеднички резултат на работата на сите поединци, како и дека благодарение на верувањето во себе е зајакната земјата и вратено е достоинството на големиот народ.

Путин вети дека ќе за залага за економски развој на земјата и за активно и одговорно цивилно општество, за диверзификација на економијата, зајакнување на развојот на неенергетскиот сектор, зачувување на бесплатното школување и здравствената заштита, зголемување на платите и пензиите, како и модернизацијата на армијата.

Путин потоа ги прими честитките на опозициските лидери и партии и се ракуваше со повеќето од околу три илјади учесници на денешната церемонија, а меѓу нив беа и поранешниот италијански премиер Силвио Берлускони, поранешниот германски канцелар Герхард Шредер и поранешниот гувернер на Калифорнија Арнолд Шварценегер.

По положувањето на заклетвата, досегашниот Претседател Дмитриј Медведев, во специјално заштитениот кабинет, му го предаде т.н. „нуклеарниот куфер“ - систем со кодовите за управување со нуклеарното оружје.

Честитка од Иванов

Македонскиот претседател Ѓорге Иванов упати честиткa до неговиот руски колега Владимир Путин по повод преземањето на функцијата претседател на Руската Федерација. Тој оценува дека македонско-руските односи се традиционално добри.

„Верувам дека ќе се согласите со оценката дека веќе подолг период се чувствува позитивната динамика во односите меѓу нашите земји. Политичкиот дијалог на високо и највиско ниво претставува гаранција за натамошно унапредување и продлабочување на плодната соработка во сите сфери од заемен интерес, особено на економски, енергетски, културен и научно-образовен план“, му пишува Иванов на рускиот претседател.