Реџепи: Македонија попречува проект финансиран од ЕУ

Според косовскиот министер Реџепи, македонските власти барале преминот да биде од пониска категорија, односно да не работи 24 часа, што било спротивно на барањето на властите во Приштина. Причина за тоа бил неасфалтираниот пат кон преминот.

„Наспроти физибилити студијата и обезбедените фондови од Европската комисија, македонската држава ја забавува изградбата на заедничкиот премин меѓу двете држави, Станќиќ-Белановце, со образложение дека еден дел од патот, во должина од 12 километри, не бил асфалтиран, поради што тие настојуваат преминот да не биде во функција 24 часа“, изјави косовскиот министер Бајрам Реџепи, а пренесе новинската агенција Илирија, повикувајќи се на Косова прес.

„Ние баравме преминот да работи 24 часа и за проток на стока, додека Македонците поради штедење или други причини инсистираа тој да биде од Б или Ц категорија“, изјави Реџепи.

На почетокот од март годинава, македонскиот министер за локална самоуправа Невзат Бејта најави дека во текот на оваа година Македонија и Косово, во рамки на ИПА 2 програмата за прекугранична соработка, ќе реализираат заеднички проект вреден 1,2 милиона евра. Проектот, освен изградба на зграда по примерот на европските држави, предвидува и изградба на пат во должина од 17 километри на потегот Белановце - Станчиќ, согласно стандардите на ЕУ.