Се’ најдобро за дваесетиот роденден на Македонија!
7 септември 2011
Сечиј роденден се прославува со гости, добра музика, храна и пијачка, па така и државниот, на кого присуствуваа многу Македонци, претставници на дипломатскиот кор и пријатели на Македонија. По изведба на националните химни на Македонија и Германија, амбасадорката Корнелија Утевска – Глигоровска накусо се осврна врз историските случувања од пред две децении и патот на државата истакнувајќи дека во Македонија се случија промени, демократијата доби на зрелост и земјата го најде своето место во светот. И токму ова, според Утевска-Глигоровска бара енергично и мотивирачки натамошно работење. Нешто е постигнато, но има уште многу што претстои.
Во амбиент придружен со музиката на Синтезис, македонското вино и храна повеќемина германски пријатели, но и луѓе со наши корени прашавме: во што го гледаат дведеценискиот растеж на малата земја од Балканот?
Постигнато е многу!
„Демократија, слобода, мирно одделување од Југославија“, им дадоа белег на изминативе години смета Натали, додека Маркус Клиер од Танс Нетворк со забелешката.
„ За дваесетте години Македонија вистински прерасна во нација. Од културен аспект има многу успешни режисери, музичари кои ширум светот се слушани.Уметници од Македонија има и тука во Берлин. За овој јубилеј, на Македонија и посакувам да и оди добро и во наредниве дваесет, педесет, двеста години...
„За мене многу впечатливо беше создавањето на полициските органи кој беше многу успешен процес. На Република Македонија и посакувам многу успех, а на нејзините граѓани се’ најдобро“, вели и Диетмар Воидке, прв човек на МВР на Бранденбург .
Сузана Јумеровска кажува дека при секое враќање во родното Скопје доживува нешто ново. Останува и дел од старото и му се радува на секој сегмент Европа што таму се доградува.
„Македонија постигна многу. Се демократизира, научи и се’ уште учи што е демократија. Затоа 20 години независна Македонија може да се каже дека се многу позитивни“, е мислењето на Павле, а Хелена која е роден оптимист дополнува:
„Се надевам дека земјата ќе продолжи и натаму да напредува и посакувам брзо да чекори на нејзиниот европски пат“.
Автор: Силвера Падори - Кленке
Редактор: Симе Недевски