1. Прескокни до содржината
  2. Прескокни до главната навигација
  3. Кон други страници на DW

Сириските мировни преговори пред колапс

Б. Георгиевски/ртр24 јануари 2014

Мировните преговори за Сирија се пред колапс уште пред вистински да започнат, откако опозицијата одби да се сретне со владината делегација, а официјален Дамаск се закани со повлекување.

https://p.dw.com/p/1AwfE
Фотографија: picture-alliance/dpa

Опозициските претставници соопштија дека не сакаат да се сретнат со делегацијата на претседателот Башар ал- Асад сѐ додека прво не биде потпишан протокол за транзициска администрација. Владата експресно го отфрли барањето и се закани дека нејзините преговарачи ќе ја напуштат Женева, доколку во следните 24 часа не започнат сериозни разговори.

„Доколку не почнеме со сериозна работа до утре (сабота), официјалната сириска делегација ќе ја напушти Женева поради недостатокот на сериозност и подготвеност на другата страна“, изјави сирискиот министер за надворешни работи Валид ал Муалем.

Денеска, за првпат по почетокот на граѓанската војна на иста маса требаше да седнат претставници на владата на Асад и опозиционерите.

Но средбата беше откажана во последен момент откако опозициската делегација побара владините претставници најпрво да го потпишат протоколот од 2012. година, познат како „Женева 1“, со кој се предвидува формирање на преодна влада која ќе ја надгледува политичката транзиција.

За што ќе се преговара?

Од опозицијата велат дека се дојдени за да дискутираат за транзиција со која Асад ќе биде отстранет од власт. Владата вели дека се во Женева за да расправаат за борба против тероризмот, термин кој го користат властите за нивните непријатели, и не прифаќаат заминување на Асад од власт.

Lakhdar Brahimi
Лакдар БрахимиФотографија: Fabrice Coffrini/AFP/Getty Images

„Планот беше првата рунда разговори да траат до следниот петок, но очекувањата се многу мали и ќе видиме како нештата ќе се одвиваат на дневна основа“, изјави анонимен западен дипломат.

Медијаторот на ОН, Лакдар Брахими изјави дека неговиот план бил да се започне со мали чекори, како договарање на прекин на огнот, ослободување на затвореници и дозвола за пристап на хуманитарни работници, пред да се започне со потешките политички прашања.

Меѓу најголемите пречки за успех на преговорите е и фактот што поголемиот дел од бунтовничката територија е под контрола на исламски милитанти кои одбија да учествуваат на разговорите.

На преговорите не присуствуваат ниту претставници на главниот сојузник на Сирија- Иран, земја која најпрво доби покана за присуство на разговорите, но потоа истата беше повлечена од генералниот секретар на ОН, Бан Ки Мун.