Сириското хемиско оружје ќе се уништува во Албанија?

Според весникот „Монд“, Бушати на средбата со својот француски колега Лоран Фабуис изјавил дека „албанската влада се‘ уште не донела никаква одлука за ова прашање“.

Францускиот весник пишува дека Албанија се смета за прифатлива земја за уништување на хемиско оружје, поради нејзината географска положба што овозможува лесен транспорт на хемиското оружје до нејзината територија.

Албанија има уникатно искуство во однос на уништувањето на хемиското оружје. Во 2007. година таа стана првата земја во светот што целосно го уништи својот хемиски арсенал, наследен од времето на комунистичкиот диктатор Енвер Хоџа.

„Монд“ го цитира и шефот на албанскиот Институт за меѓународни истражувања Алберт Ракипи, според кого, „посткомунистичка Албанија не била многу доследна во однос на екологијата“. Ракипи смета дека ќе биде грешка доколку Албанија сега го прифати сириското хемиско оружје, непосредно по одлуката на новата албанска влада да го забрани увозот на отпад. Според него, тоа ќе создаде забуна меѓу граѓаните на земјата.

„Уништувањето на хемиското оружје во Албанија не е начинот Албанија финансиски да се опорави“, додава Ракипи.

Поранешниот албански министер за одбрана Фатмир Медиу, исто така, се изјасни против операцијата за уништување на сириското хемиско оружје на албанска територија, забележувајќи дека во Албанија биле уништени само 16 тона хемиски материјали и дека тоа се случило со помош на странски експерти, додека количествата на хемиско оружје од Сирија се огромни и албанските власти нема да можат сами да се справат со оваа задача.

Во меѓувреме организации за заштита на животната средина од Албанија предупредија дека ќе побараат организирање референдум за ова прашање, доколку владата во Тирана го прифати предлогот на Американците за уништување на сириското хемиско оружје.