Скопје на второ место за инвестирање во Европа
5 јануари 2012
Скопје се пласираше на високото второ место на ранг-листата на најдобри места за инвестирање во недвижности во Европа, на Глобалниот водич за недвижности која ја објави британскиот весник Дејли Телеграф.
На прво место е Будимпешта, а на третото Амстердам. Весникот проценува дека добри страни на инвестирањето во Скопје се високите профити, пазарот за изнајмување во корист на сопствениците, ниските трошоци на трансакции и средните даноци на приход. Како лоши страни се издвојуваат сериозните ограничувања на сопственоста, како и политичката и безбедносната загриженост.
На листата доминираат градови од Источна Европа, за кои, слично како и во случајот на Скопје, се наведуваат можностите за добар профит, ниските трошоци за трансакции, како и законите кои ги фаворизираат сопствениците на недвижностите, наспроти станарите и изнајмувачите.
Покрај Скопје и Будимпешта, на листата меѓу првите 20 се уште и Загреб, Варшава, Букурешт, Братислава, Софија, Прага и Љубљана.
Од поголемите западно-европски градови, покрај Амстердам, фигурираат и Рим, Берлин, Париз, Виена, Брисел и Хелсинки.
Автор: БГ/миа
Редактор: Александра Трајковска