Словенија: Македонија ќе добие позитивен пролетен извештај од ЕК

Пролетниот извештај за Македонија ќе биде позитивен бидејќи земјата покрај реализирањето на реформите прави одлични напори и во добрососедските односи кои се приоритет, оцени шефот на словенечката дипломатијата Карл Виктор Ерјавец на заедничката прес-конференција со неговиот македонски колега и домаќин Никола Попоски.

Словенија ја поддржува Македонија во ЕУ и НАТО-интеграциите, посочи Ерјавец и изрази надеж дека Скопје и Атина ќе најдат заедничко решение во однос на спорот за името.

„Словенија смета дека Македонија ги исполнува сите услови за полноправно членство во ЕУ и во НАТО. Се надевам дека Македонија и Грција ќе изнајдат заедничко решение за спорот со името и на тој начин ќе се забрза патот на земјата кон полноправно членство во евроатлантските организации. Добро паметам дека понекогаш е тешко да се изнајде такво решение. Словенија има вакво искуство со Хрватска, но со дијалог, добра волја и со голема енергија дојдовме до решение прифатливо за двете страни“, рече Ерјавец.

Шефот на македонската дипломатија Попоски истакна дека пролетниот извештај за Македонија е резултат на динамичните декемвриски заклучоци на Европскиот совет, а ќе го одрази постигнатиот напредок во реформите. За добрососедските односи тој посочи дека Македонија е посветена на нивното унапредување преку интензивната комуникација со Бугарија и бројните иницијативи предложени до Грција.

Во однос на посетата на Кетрин Ештон, шеф на дипломатијата на ЕУ, Попоски со став дека е таа дел од редовната комуникација со Европската комисија.

„Се работи за нормална комуникација со ЕК по завршувањето на последниот пристапен дијалог на високо ниво. Ештон е фокусирана на дијалогот меѓу Белград и Приштина, но не мислам дека има корелација во однос на континуираниот процес кој го водиме во ОН за решавање на спорот со Грција“, рече Попоски.

Во фокусот на денешните разговори на Ерјавец со Попоски било интензивирање на економската соработка и трговската размена меѓу двете земји со акцент на искористување на потенцијалите во областа на туризмот, енергетиката и особено термалните извори.

Двајцата министри нагласија дека ќе продолжи развојната помош која Словенија и‘ ја дава на Македонија. Ерјавец даде уверување дека и покрај економската криза во Словенија која, како што тврди, се должи на одржувањето на стабилноста на еврото, депозитите на македонските граѓани во НЛБ Тутунска се безбедни.

Ова е прва посета на шефот на словенечката дипломатија Ерјавец на Македонија по неговото назначување на оваа функција во новата словенечка влада. Ерјавец претходно во поранешниот владин состав ја вршеше функцијата министер за одбрана.