Српскиот државен врв во непрекинато заседавање за Косово
6 април 2013Агенцијата Бета, повикувајќи се на свој извор, јавува дека засега не е закажана вонредна седница на Владата на која министрите би можеле да се изјаснат за понуденото решение. Српскиот премиер Ивица Дачиќ (на фотографијата горе) вчера, на седница на Владата, ги известил министрите за текот на преговорите во Брисел, но на таа седница не е донесена одлука.
Потпретседателот на српската Влада, Расим Љајиќ, денеска изјави дека владејачката коалиција е согласна во оценката дека планот за Косово којшто на Србија и‘ е понуден во Брисел е незадоволителен и дека ако тој биде прифатен, тоа ќе биде затоа што сите останати алтернативи се уште полоши и понеприфатливи. Љајиќ во изјава за агенцијата Бета нагласи дека Србија треба да води сметка за чувањето на внатрешната политичка стабилност и да го продолжи патот на европско интегрирање.
Според Љајиќ, доколку Србија не го прифати планот од Брисел, ќе влезе во период на несигурност, неизвесност и ќе доцни барем две години во европските интеграции. Потпретседателот на српската Вада напоменува дека паралелно со консултациите во српскиот државен врв траат и дипломатските активности, а се бараат и јасни гаранции дека Србија, доколку се согласи со планот, во јуни сигурно ќе добие датум за почеток на преговори со ЕУ.
Љајиќ порачува дека треба да се води сметка за тоа што би се случило за три или четири години доколку Србија сега одбие се‘. „Ова историско НЕ да не стане за 3-4 години историско ДА, само што се загубиле три до четири години“, предупредува Љајиќ.
Белград и Приштина имаат рок до 9 април да се изјаснат за решенијата за Косово. На последната рунда од дијалогот во Брисел немаше договор. Белград останува на ставот дека прашањата „кој ги чува, брани, тужи, суди, лекува и школува Србите“, се приоритетна надлежност за заедницата на српските општини на Косово. Приштина повторува дека на таа заедница не и‘ допушта извршни и законодавни функции.