Стартот во знакот на „Ван Гол“ и Капитано

Капитано се врати. По четири години минати во Англија, долгогодишниот капитен на германската фудбалска репрезентација, Михаел Балак повторно игра во Бундеслигата. Стартот не можеше да биде подобар со оглед дека неговиот старо-нов клуб Бајер Леверкузен надмоќно ја совлада нагости Борусија Дортмунд. Повратникот беше презадоволен: „Повеќе човек не може да си посака. Почетна победа во Дортмунд, при што Борусија многу силно стартуваше во сезоната. Тоа е она што ми е потребно по три месечна пауза“, рече по вчерашниот меч Балак.

Два гола на Руд ван Нистелрој

Едно од неколкуте изненадувања во првото коло на Бундеслигата се случи во вториот вчерашен натпревар во кој Мајнц на македонскиот репрезентативец Николче Новевски дома убедливо го совлада фаворизираниот Штутгарт.

Колото го одбележа и „Ван Гол“. Легендарниот холандски напаѓач Руд Ван Нистелрој ја започна сезоната со два гола за неговиот Хамбург кои беа одлучувачки за победата против ривалот за висок пласман Шалке 04 од 2:1. „Вечерите како оваа за еден фудбалер, но и за навивачите се причина зошто го прават сето тоа. Во ова мора да се ужива, но мора да останеме и смирени и да продолжиме натаму“, порача Нистелрој по мечот во кој настапи против својот поранешен партнер во нападот на Реал Мадрид, Раул кој меѓутоа одигра слабо во дебитантскиот настап за Шалке.

Исклучување по неполни две минути

Изненадувања приредија и двата тима новајлии во Бундеслигата. Санкт Паули и Кајзерслаутерн славеа убедливи и идентични победи од 3:1 нагости против Фрајбург и Келн. „Ова е важно за нас за да можат играчите да сфатат дека можеме да играме во Бундеслигата, како што покажавме денеска“, констатираше тренерот на Санкт Паули, Холгер Станиславски.

Куриозитет на мечот меѓу Келн и Кајзерслаутерн беше најбрзото исклучување во историјата на Бундеслигата. По само 87 секунди игра, судијата поради груб старт му покажа црвен картон на капитенот на Келн, Јусеф Мохамад.

Изненадување може да се нарече и катастрофалниот пораз од 4:1 на Вердер Бремен од Хофенхајм, кој по првото коло може да се радува на првото место на табелата.

Хановер во саботата беше подобар од Ајнтрахт Франкфурт со 2:1, а единствениот нерешен исход во првото коло беше во Менхенгладбах меѓу домашната Борусија и Нирнберг.

Колото традиционално го отвори шампионот. Во Минхен актуелниот првак Бајерн извлече победа од 2:1 во последните секунди од натпреварот против квалитетниот Волфсбург.

Автор: Андреас Цимонс/ Симе Недевски

Редактор: Александра Трајковска