Телото на Јасер Арафат ќе биде откопано во вторник
24 ноември 2012„Гробот ќе биде отворен на 27 ноември и експертите ќе земат примероци истиот ден во рок од неколку часа“, информираше во Рамалах поранешниот шеф на палестинската разузнавачка служба Тафик Тирави.
Тој појасни и дека церемонијата со воени почести за повторен погреб ќе биде направена подоцна во текот на истиот ден. Тирави, кој е на чело на комисијата за истрага на смртта на Арафат, изјави и дека во земањето примероци за анализа ќе учествуваат швајцарски, француски и руски експерти.
Францускиот тим пристигна вчера во Рамалах, а другите два тима се очекуваат да пристигнат утре. Работници од пред десет дена започнаа со постапката за отворање на гробот на Арафат. Зафатот за отворање на гробот ќе биде завршен во понеделник. Резултатите од тестовите ќе бидат познати за неколку дена или, пак, до крајот на годинава, изјави анонимен избор од палестинските власти.
Арафат почина во ноември 2004-та година, еден месец откако одеднаш се разболе, па затоа палестинските власти инсистираат на тоа дека Арафат е отруен од Израел. Израелските власти ги негираат таквите обвинувања. Сепак, остатоците од смртоносна радиоактивна супстанца – полониум, во биолошките траги на облеката на Арафат, кои беа пронајдени на почетокот од годинава, предизвикаа покренување на нова истрага.