1. Прескокни до содржината
  2. Прескокни до главната навигација
  3. Кон други страници на DW

Тенка туристичка сезона во Македонија

19 септември 2010

Македонија минува низ уште една лоша туристичка сезона. Странски гости има помалку од лани, не помогнаа ниту субвенциите што ги нуди државата. Хотелиерите не ги намалуваат цените, а нема ни нискобуџетни авиокомпании.

https://p.dw.com/p/PFxK
Кога ќе се наполнат повторно охридските плажи?Фотографија: Petar Stojanovski

На залезот на туристичката сезона Македонија се соочува со горчливата вистина дека и оваа 2010 е уште една промашена година за туризмот. Дејноста која може да биде стратешка во кревката македонска економија никако не може да го пробие патот до местото што го заслужува. Не помогнаа ниту субвенициите за туризам што за прв пат се доделуваат од годинава. Убавата сума пари државна помош за туристичките оператори кои ќе донесат странски гости остана речиси негибната, а бројот на туристи е помал од лани. Туристичките агенции се сконцентрирани главно на полнење на странските капацитети со гости од Македонија. Да ги примамите странците во Македонија е многу потешко признава Александар Чоневски од Игуана.

Ohrid
Портите отворени, но цените се високиФотографија: Petr Stojanovski

“Тур операторите не гледаат интерес да ја продаваат и нудат Македонија“.

Пропуштени собвенции

Од 1 јануари 2010 секој туристички оператор може да добие меѓу 10 и 45 евра за секој странски турист што ќе го донесе во Македонија. Условот е да бидат реализирани најмалку три ноќевања во хотел и гостите да имаат организиран групен автобуски, авионски или железнички превоз. Сумата зависи од земјата од која доаѓа гостинот. Колку подалечна земја толку повисока субвенциија за агенцијата. Според податоците од Министерството за економија, во финишот на туристичката сезона бројките се поразителни: само три агенции искористиле субвенции во висина од 2000 евра. Неискористени остануваат 170 илјади евра предвидени за таа намена. Надлежните велат дека е рано да се оценува ефектот од субвенциите, но експертите се критични. Професорот од факултетот за туризам Зоран Тунтев вели: “Не можам да се сложам дека Македонија нема што да понуди. Странците се одушевени од она што го наоѓаат овде. Толку многу ефтини атрактивности на мал простор нема“.

Mazedonien Land und Leute Alexander der Große Flughafen in Skopje
Нискобуџетните авиокомпании ја заобиколуваат МакедонијаФотографија: Petr Stojanovski

Повеќе причини за кризата

Туристичката комора на Македонија подготвува извештај за туристичката сезона годинава. Првичните сознанија се дека имало многу помалку гости од претходните години, а има повеќе причини за тоа. Глобалната ситуација, задоцнетата реакција од хотелиерите да ги намалат високите цени на ноќевање, недостигот на нискобуџетни авиокомпании кои ќе понудат евтини авионски билети.

Автор: Горан Петрески

Редактор: Горан Чутаноски