„Транзициските“ згради (не)отпорни на земјотрес

Колку македонските граѓани можат да се чуствуваат безбедни во градбите изградени во бурниот период на транзиција во која сите сфери на општеството минаа или сеуште се во фаза на длабока криза. Урбанизмот не е исклучок од негативните трендови. Многу луѓе се скептични дека се почитувале сите стандарди во градежништвото и дека не се штедело токму на прописите кои се однесуваaт на статиката на градбите.

Со безбедноста никој не би ризикувал?

Поранешниот градоначалник на Скопје, Ристо Пенов смета дека новите прописи ги спуштиле стандардите.

„За жал пред 15 – 20 години се изменија законите со кои обврската секој проект секој објект да има надзор од сеизмичка институција се отфрли. На тој начин увидот во тоа што се гради е мал“, изјави Пенов за Дојче Веле.

Урбанистите се уверени дека фелата сепак ги почитува основните професионални стандарди и дека никој не би ризикувал да си поигрува со делот што се однесува на безбедноста. Митко Кржовски е сопственик на Фин инжинеринг, компанија која изгради станбени згради на повеќе локации низ Скопје. Уверен е дека не само тие туку сите нови градби се изградени согласно прописите.

“Јас ве уверувам дека не постои инжинер кој би го изгубил лебот со тоа што ќе излезе од проектот за да им заштеди на инвеститорите“, вели Кржовски.

Сеизмолошките прогнози смируваат

Сепак експертите од градежништвото оставаат простор дека се направени пропусти. Македонија која по скопскиот земјотрес стана лидер во регионот за оваа проблематика во периодот на транзиција ги испушти конците од рака. Професорот од скопскиот Градежен факултет Горан Марковски вели дека е тестирана сеизмичката стабилност на градбите изградени до 1990.

Смирува податокот што го нудат сеизмолозите а тоа е дека во Македонија не се очекуваат разорни потреси какви што беа неодамнешниот во Јапонија или ланскиот во Чиле. Македонија е трусно подрачје но без очекувани земјотреси од таков карактер.

Автор: Горан Петрески

Редактор: Симе Недевски