Турција го возвраќа ударот – Франција изврши геноцид во Алжир

Обвинувањето за француски геноцид во Алжир стаса откако вчера (22.12.) француските парламентарци во Долниот дом го изгласаа предлог-законот со кој негирањето на геноцидот врз Ерменците, извршен во Отоманската империја во 1915-та година, се прогласува за кривично дело.

„Францускиот масакар се проценува на 15 проценти од популацијата во Алжир, почнувајќи од 1945-та. Ова е геноцид“, рече на прес-конференција Ердоган.

Спорниот закон во Франција предвидува казна затвор од една година или парична казна од 45 000 евра, доколку се негира геноцидот врз Ерменците.

Така, дипломатските односи меѓу Париз и Анкара се заладија и можеше да се предвиди првата реакција – Турција го повлече амбасадорот од Париз. Но, 50-те француски пратеници, кои со големо мнозинство гласаа за законот, не сакаа да потклекнат под притисокот што го вршеше Анкара во минатите денови. Пратеничката Валери Боаје го предложи законот според кој, откако ќе биде усвоен и во Горниот дом на парламентот – Сенатот, ќе се казнува негирањето на геноцидот врз Ерменците.

„Повеќе пати повторивме дека текстот не е насочен против една одредена земја. Но, однесувањето на една одредена земја, која тежнее кон Европа, но и како прва се заканува со одмазда кон Франција, која, пак, само се потпира врз европското право, е противречно. Освен тоа таа се заканува и со економски санкции, со што би ги погазила меѓународните договори“, вели Валери Боаје, членка на конзервативната партија УМП на Никола Саркози.

Задоволство во Ерменија

Шефот на ерменската дипломатија Едуард Налбадијан и’ изрази благодарност на Франција со зборовите:

„Сакам уште еднаш да им изразам благодарност на највисоките француски надлежни органи, на парламентот и францускиот народ“.

Во Ерменската престолнина Ереван, еден од посетителите на музејот на геноцидот вака реагираше на одлуката на француските пратеници:

„Тие тоа го прават за целиот свет, за идната генерација, која за историјата се информира и на интернет. Интернетот е полн со погрешни информации и може луѓето да ги држи во заблуда. Ако светот не го признае и не го осуди геноцидот врз Ерменците, првиот геноцид во 20-тиот век, тогаш такво нешто може повторно да се случи“.

Протести во Франција

Во четвртокот утрото околу илјада Французи со турско потекло протестираа против нацрт-законот. Еден маж притоа рече:

„Овде се криминализира една цела група на жители. Нас во Франција не‘ има околу половина милион до шестотини илјади. И сето тоа за да се обезбедат гласови од Французите со потекло од Ерменија“.

Тоа е аргумент за кој се расправаше и во парламентот. Пратеничките групи им препуштија на пратениците да гласаат според совест. Така, малцинство во сите политички табори беше мислењето дека не треба да се казнува негирањето на геноцидот врз Ерменците во Првата светска војна.

Во Франција уште пред десет години е усвоен закон според кој Франција го признава тоа злосторство како геноцид. Претседателот Саркози во 2007-ма, кратко по изборот, имаше намера со новиот закон да ги опфати и казните.

Францускиот правник Роберт Бадентер се смешка кога зборува за законот, којшто е усвоен токму сега - на четири месеци пред претседателските избори.

„Не станува збор за ненадејна посветеност само на исправање на историјата, што ги тера пратениците на ваква одлука. Сенатот еднаш веќе ја одби таа игра и сфати дека тоа е противуставно. Политиката не е историска наука. Да ја препуштиме историјата на историчарите“, порачува Роберт Бадентер.

Автор: Јоханес Дуров / Александар Методијев

Редактор: Ж. Ацеска