Уметноста - омилена алтернативна инвестиција во криза

Скулптурата „Мачка“ од Ернест Лудвиг Кирхнер, еден од најпопуларните уметници во моментов, е дадена на аукција. „Мачката“ на крајот на наддавањето е продадена за 165.000 евра.

Аукционерот Роберт Кетерер е под притисок. Тој сака на аукција да даде и бројни други уметнички дела и да оствари приход од вкупно 12 милиони евра. Тоа може да му успее зашто пазарот на уметност и натаму цути.

„Низ сите кризи последниве години и децении, а јас го работам ова веќе 24 години, уметноста и токму ретките, интересни дела на уметниците, се се' поскапи. Нема назад. Тоа во моментов е многу силен тренд, кој сите го гледаат. И зошто да не се вложува таму каде што има смисол?", вели аукционерот Роберт Кетерер.

Нема опасност од паѓање на цените

Интернационални супер-ѕвезди како Пикасо се исто така застапени на аукцијата во Минхен, впрочем како и на сите други големи аукции. Се лицитира и од странство, што дополнително ги крева цените.

Со оглед дека цените веќе подолго време растат, некои сметаат дека постои опасност набргу и да паднат. Но Волфганг Крам, колекционер на уметнички дела истакнува: „Не, не верувам во тоа. Има одредени дела кај кои тоа може да се случи , но кај уметноста има тенденција да биде релативно безбедна и разумна инвестиција."

Меѓутоа никој на аукцијата не ги инвестира сите свои пари во уметност, зашто тоа сепак би било премногу ризично.

Делата од времето пред и по Првата Светска Војна, како ова од Курт Вајнхолд, претставник на т.н школа „Нова Објективност", во моментов се посебно барани.

Безбедна инвестиција

Сопственикот на аукциската куќа „Кетерер" се жели меѓутоа дека занимливи уметнички дела има се’ помалку: „Најголеми потешкотии имаме да дојдеме до дела, до вистински интересни објекти, кои во моментов се барани на пазарот. Главниот проблем е дека дела има се' помалку. Тоа не е случај само кај нас, туку и на другите интернационални аукции".

Но зошто е тоа така? „Затоа што многу доставувачи, сопственици, не знаат што да прават со парите. Тоа е главниот проблем, навистина страшно", дообјаснува Роберт Кетерер. Највисока цена на аукцијата достигна делото на Серж Полјаков - 525 илјади евра. Аукцијата на крајот донесе вкупно 13 милиони евра - нов рекорд!

Во ова несигурно време за многумина скапите уметнички дела веќе подолг период се омилена алтернативна и пред се’ безбедна инвестиција. И трендот продолжува...