Филе гледа шанса за решение за името

Македонија треба да ја искористи можноста што постои за решавање на спорот за името со цел да продолжи процесот на нејзината евроинтеграција, порача денеска во Скопје, комесарот на ЕУ за проширување, Штефан Филе. „Има таква можност во овие неколку месеци и најдобро е таа да се искористи“, изјави Филе. Тој побара од македонските власти да ги засилат реформите во областа на јавната администрација, судството и борбата против корупцијата.

Германскиот европарламентарец Јорго Шацимаркакис денеска (19.02.2010) соопшти дека Груевски претставил предлог за решавање на спорот за името, но одби да каже детали. „Во наредните денови ќе биде обелоденет предлогот“, изјави германскиот европратеник. Тој предупреди дека доколку не дојде до решение за името, на земјата и претстои застој и можна замореност кај граѓаните од Европа. Македонскиот премиер Никола Груевски демантираше дека на средбата со европарламентарците презентирал конкретен предлог за надминување на спорот за името.

Во целата неизвесност, дали македонската влада има нова инцијатива за решавање на спорот со името, двосмислен одговор дојде и од претседателот на владејачката ДУИ, Али Ахмети. Важните теми, договори и преговoри, не се прават пред медиумите, изјави Ахмети по средбата со еврокомесарот за проширување. Сите сме фокусирани да се изнајде решение, и ДУИ ќе има конструктивна улога да се надмине спорот со името, рекол Ахмети. Европскиот комесар за проширување Штефан Филе се среќава и со претседателот на СДСМ, Бранко Црвенковски.

Автор: БГ/АТ/АЧ/миа