Фитнес и за сениорите

Од една страна поради падот на наталитетот, а од друга страна поради се´ поголемиот број повозрасни лица, како последица на подобрите животни услови и напредокот на медицината, западните општества се се´ постари. Само во Германија во 2050 година бројот на граѓаните постари од 60 години ќе ја надмине границата од 30 милиони. Добар дел од нив веќе не се однесуваат како што тоа беше случај пред некоја година. Денешните пензионери остануваат активни и по завршувањето на работниот век, засилено се вклучуваат во општествените расправи, но и телесно остануваат поактивни отколку генерациите кои им претходеле. Тој тренд го подржува и државата.

Полесно секојдневие

Во преуредената сала на еден парохиски дом на периферијата на Келн, девет постари госпоѓи вежбаат со тегови „Тоа е добро за мускулите и коските. По вежбата се чувствувам извонредно, секому тоа можам да му го препорачам”, коментира една од учесничките во тренингот. Тоа е целта на програмата „Фит и во стотата”, која е развиена под надзор на познатиот Факултет за спорт во Келн.

Целта е возрасните лица со помош на два часа тренинг седмично да се одржат во форма. Секојдневните активности, како што се качувањето по скали или одењето на купување, би требале заедно со вежбите да станат сами по себе разбирливи. На тренингот во Келн учествуваат сениорки и сениори на старосна возраст од 60 до 85 години. Вежбите за постарите се целно конципирани. „Еднаш неделно по два часа не е исто што и два пати седмично по еден час”, објаснува Франк Нидер од Институтот за спортска геронтологија на Факултетот за спорт во Келн. „Сите вежби имаат за цел јакнење на мускулите, посебно ножните и грбните”, вели Нидер.

Телесната активност ја подобрува физичката состојба и го јакне духот

Едно од најпозитивните искуства на следењето на учесниците на тренингот скроен за постарите е тоа што се покажало, дека телесната активност влијае позитивно на се´, без оглед, дали се работи за лица, кои целиот живот биле физички активни, или за оние, кои дури по заминувањето во пензија ја откриле благодетта на тренирањето. Откриено е, дека староста не игра улога во подобрувањето на телесната состојба. „Сега можеме да кажеме, дека кај сите старосни групи, па дури и кај 90-годишниците е забележано подобрување што се однесува до силата во нозете или рацете, но и подвижноста и чувството за рамнотежа”, вели Нидер.

Освен позитивниот ефект на телесната состојба на учесниците, тренингот позитивно влијае и на социјалниот живот на сениорите. Многумина веќе по неколку средби се врзуваат за својата група и склопуваат нови познанства и пријателства.