Човечка трагедија во Багдад

Стотици илјади верници изутринава оделе во насока на џамијата на имамот Муса ал Кадим, чија смрт се одбележува секоја година од деветтиот век наваму. На мост на реката Тигар, преполн со луѓе, избила паника поради гласините дека во масата народ има атентатор самоубиец. Толпата почнала да се меша, луѓе почнале да паѓаат во реката, а други биле едноставно притиснати од масата народ.

“Бевме на мостот и беше преполно. Околу мене имаше илјадници луѓе. Слушнавме дека меѓу луѓето има атентатор самоубиец. Тогаш скокнав од мостот и испливав на брегот. Видов како во водата паѓаат жени, деца и стари луѓе“, раскажува 28 годишниот Фадел Али, кој се спаси од човечкото инферно.

На собирот на аџиите, според проценките, учествувале околу милион луѓе. Инаку, само два часа пред уривањето на оградата на мостот, околината на џамијата беше гранатирана и притоа загинаа седу, а повредени беа 40 лица. Во минатото, шиитските собири и прослави беа повеќепати напаѓани од сунитски екстремисти.