Шпанија тоне се’ подлабоко во рецесија

Денешните податоци покажуваат дека шпанската економија тоне се’ побрзо и оти трошоците за долгорочни заеми се искачени на опасно високо ниво. Во првиот квартал од годинава шпанската економија падна за 0,3 проценти, а во вториот за дополнителни 0,4 проценти. Шпанската влада уште во петокот (20.07.) објави дека рецесијата во земјата ќе продолжи и следната година.

Шпанските власти се обидуваат да се справат со невработеноста од 24 проценти, а во исто време се обидуваат да го стабилизираат погодениот банкарски систем и проблематичните јавни финансии.

Владата во Мадрид неодамна објави масовни кратења на трошоците и други мерки за стабилизирање на јавните финансии, но се чини дека програмата за штедење само донесе шпекулации оти на Шпанија ќе и’ треба целосен пакет помош од ЕУ и ММФ. Бидејќи шпанската економија е поголема од грчката, ирската и португалската заедно, во ЕУ расте загриженоста дека спасоносните мерки можеби нема да бидат доволни за справување со кризата, посебно ако и Италија има проблеми.

Инвеститорите се скептични дека шпанската влада може да се справи со долговите во време на рецесија. Шпанија е заглавена во рецесија вторпат во три години. На 13-ти јули годинава беше формиран фонд за 17-те шпански региони во кој има капитал од 18 милиони евра. Валенсија и Мурсија се последните два региони кои бараат парична помош од официјален Мадрид. Многу шпански региони се во рецесија и не можат самите да подигнуваат пари.