Ѕвездите доаѓаат во Берлин

Со музичката честитка за 60-тиот роденден од Африка стартуваше гала отворањето на филмскиот фестивал. Во палатата на Берлиналето, во која за чудо не беа пополнети сите места, најпрво збор имаше првиот човек на фестивалот Дитер Кослик или како што го именуваат, Мистер Берлинале. Тој за главната тема на јубилејното издание – семејството, забележа дека по кризите и перипетиите семејството е местото кон кое сите се враќаат.

"Без Берлиналето не може да се замисли културното живеење на Германија и на овој град. Тоа имаше свои кризи и скандали, беше дури еднаш прекинато, но секогаш одново се наоѓаше себеси и денес е посвежо, помладо и поекспертиментално од кога и да е порано”, истакна и државниот секретар задолжен за културата, Бернд Нојман, кој осврнувајќи се на историјата, потсети дека Берлиналето беше основано од Американците, беше чедо на студената војна кое требаше на разурнатиот град да му го врати сјајот и гламурот. Но, требаше и да провоцира, да биде излог на слободниот запад, на културното живеење.

Мост меѓу културите

"За првпат тука се прикажаа филмови од истиочна Европа, од ДДР кои прашање е дали воопшто некогаш и би биле прикажани, или веројатно многу подоцна. Никаде киното, политиката и публиката не се така испреплетени. Берлиналето беше симбол за престолнината, фестивал кој е против делбите и омразата, а е за толеранцијата”, подвлече Нојман, заблагодарувајќи им се на сите кои досега придонеле Фестивалот да биде она што е: мост меѓу световите и културите. Збор имаше и градоначалникот на Берлин Клаус Воверајт, а беше претставено и меѓународното жири предводено од Вернер Херцог, по што фестивалот беше и официјално прогласен за отворен.

Почеток со кинески филм

Роденденскиот старт го означи светската премиера на кинескиот филм на Ванг Кванан “Туан Јуан” - “Одвоени, а заедно".

Тоа е филм за љубовта, разделеното семејство, стареењето, за граѓанската војна во Кина од која минале 50 години.Многу од војниците на Тајванската народна партија, кои се бореле против кинеските комунисти, меѓу кои и Лиу Јаншенг, пребегнале на Тајван. По 50 години тој се враќа во Шангај да ја сретне големата љубов Кијао Јуе, која пред пет децении морал да ја напушти иако чекала дете. Филмот е повеќе од семејна драма.

Испреплетени се и судбините на цели генерации. На старите и младите, кои се борат за повеќе пари и имаат се’ помалку семеен живот. Тоа е приказна со силни емоции и слики од заднината кои говорат многу повеќе за минатото и сегашноста на Кина.

Автор: Силвера Падори-Кленке

Редактор: Жана Ацеска