Израел отфрла пауза во борбите во Газа
4 ноември 2023
Израелскиот премиер Бенјамин Нетанјаху изјави дека отфрла каков било привремен прекин на огнот во војната против Хамас, кој не вклучува ослободување на сите заложници.
„Израел отфрла привремен прекин на огнот кој не вклучува ослободување на нашите заложници. Израел нема да дозволи влез на гориво во Газа и се противи на испраќање пари во Појасот Газа“, порача Нетанјаху во синоќешното (03. ноември, 2023) телевизиско обраќање, по средбата со американскиот државен секретар Антони Блинкен во Тел Авив.
Тој додаде дека Израел нема да запре со воените операции додека не победи.
„Ќе го уништиме Хамас, ќе ги вратиме заложниците и ќе ја обезбедиме безбедноста на нашите граѓани и деца“, рече Нетанјаху.
Тој ги пофали израелските војници, велејќи дека тие „убиваат терористи во Газа деноноќно“, во тесна соработка на копнените и воздушните сили на израелската армија (ИДФ).
Американскиот државен секретар Ентони Блинкен беше третпат во Израел од почетокот на војната на Блискиот Исток во октомври. Тој му повтори на Нетанјаху дека еврејската држава има поддршка од САД за нејзината вооружена борба против Хамас, но рече и нешто што американскиот претседател Џозеф Бајден веќе го кажа - дека е потребна пауза во борбите за да се олесни сѐ потешката хуманитарна криза во Газа.
По разговорите со Нетанјаху, Блинкен рече дека пауза во воените операции е неопходна за да се достави дополнителна хуманитарна помош и да се помогне во ослободувањето на заложниците киднапирани од Хамас на 7 октомври.
Американските власти велат дека не бараат прекин на огнот, туку кратки паузи во одредени области за да се овозможи испорака на хуманитарна помош и други хуманитарни активности, по што Израел би можел да продолжи со воените акции.
Хамас, палестинското милитантно движење кое управува со Газа, во својот ненадеен напад врз Израел на 7 октомври уби околу 1.400 цивили и зеде заложници, како Израелци така и странци.