Идниот еврокомесар за проширување воздржан за Македонија

Штефан Филе зборуваше за Западниот Балкан. Тој стави на знаење дека има намера во текот на неговиот мандат да внесе во ЕУ што повеќе држави од регионот, доколку тие ги исполнат обврските. Филе сака да се фокусира и на промовирањето на проширувањето на Унијата кај пошироката јавност. За него е многу важно европските граѓани да разберат дека приемот на нови земји членки не ги засега само политичарите

„Со усвојувањето на Лисабонскиот договор имаме одлична прилика да го направиме процесот на проширување пополитички. Сакам да ги вклучам и очекувам од политичарите ширум Европа да се ангажираат во овој процес. Сакам да ги мобилизирам сите алатки од страна на ЕК за да им ги објасниме на европските граѓани придобивките од проширувањето, бидејки една работа е јасна – ако не ги убедиме нашите граѓани дека тоа што го правиме е добро не само за Европа и за политичарите, туку и за нив, тогаш ова ќе биде пораз.“

За Македонија повторено веќе познатото

Филе доби прашање и за Македонија кон кое се покажа прилично воздржан. Јасно е дека Комисијата сака да започне преговори со земјата, но проблемот со името мора да се реши, истакна Филе:

„За ФИРОМ, знаете дека најтешките дискусии се одвиваат под покровителство на ОН. ЕУ целосно ги поддржува ОН и господинот Нимиц и се надевам дека двете страни ќе ја искористат приликата. Знаете дека ЕК предложи да се започнат преговорите со Поранешната Југословенска Република Македонија и се надевам дека тоа наскоро ќе се случи.“

Европратениците се задоволни

Штефан Филе кој доаѓа од Чешка е одлично запознат со процесот на реформи на земјите кандидати и свесен за значењето на полноправното членство во ЕУ за поранешните комунистички држави, рече тој.

Европските пратеници се покажаа задоволни од неговиот настап, како и од неговото богато работно искуство.

Филе доаѓа на местото на Оли Рен, но освен за проширувањето како што беше до сега, новиот комесар ќе биде одговорен и за соседската политика на ЕУ.

Автор: Тања Милевска

Редактор: Елизабета Милошевска Фиданоска