„Шпион“: Кривични пријави за 20 лица осомничени за шпионажа

До Основното јавно обвинителство за организиран криминал Министерството за внатрешни работи поднесло кривична пријава против 20 лица осомничени за злосторничко здружување, злоупотреба на службена должност, шпионажа, уцени и измама. Станува збор за поранешни и сегашни вработени во МВР, во Военото разузнавање, во Агенцијата за разузнавање, државни институции, вработени во приватни фирми и сопственици на медиуми. По три лица полицијата се‘ уште трага.

Како што информираше на денешната (17.09) прес-конференција министерката за внатрешни работи Гордана Јанкулоска, МВР има информации за странските служби со кои соработувале, а најчесто тоа било со служба на една соседна држава. За возврат добивале не само парични средства, туку и имоти, патувања и се‘ друго што им овозможува луксузен живот. Јанкулоска денеска не сакаше да открие за која земја станува збор. Организираната група започнала со работа уште во 2005 година, кога еден од осомничените добил отказ од Агенцијата за разузнавање.

Јанкулоска нагласи дека ова е еднo од најтешките кривични дела против државата и дека распитот на дел од осомничените се‘ уште не е завршен, а доказите и користената техника се обезбедени на законски начин.

Во извршените претреси кај 17 лица во 30 објекти во Скопје пронајдени биле и дадени на вештачење 1.095 парчиња муниција, 481 цедиња, 125 вежбовни куршуми, 81 компјутер, 57 мемориски уреди, 25 парчиња огнено оружје, детектор за прислушни средства и друго.