Ќе може ли Ирска без европска помош?

Не стивнуваат гласините дека Ирска наскоро ќе мора да побара поддршка од фондот за помош на Европската унија. Претседателот на Европската комисија Жозе Мануел Барозо и повеќе премиери од Европа, на Самитот Г20 во Јужна Кореја се обидоа да ги смират гласините, но тоа досега немаше резултати.

Одржување на финансиската стабилност

Портпаролот на Европската комисија Амадеу Алтафај во Брисел на вчерашната (15.11) прес-конференција постојано го бомбардираа со истото прашање: Каква е состојбата во Ирска? Дали планираат акција за спасување? Алтафај избегна официјален демант, и рече дека тоа е „преувеличување“:

„Тие не побарале финансиска помош. Освен тоа долговите на Ирска може целосно да се финансираат до 2011 година. Значи не постои непосредна потреба за помош.“

Алтафај потврди дека се „загрижени за финансиската стабилност на еврозоната во целина“. Но, ирската влада досега направи многу за консолидација, и со тоа ја стекна нашата доверба:

„Состојбата е сериозна, но ирските власти се одлучни во остварувањето на плановите за буџетот, првенствено на планот до 2014 година да има дефицит во буџетот од најмногу три проценти од домашниот бруто производ. Нема сомнение дека земјите-членки на Европската унија, а пред се‘ оние кои се под голем притисок, ќе ги преземат сите неопходни мерки.“

ЕУ гарантира сигурност

Тогаш зошто се шират гласини дека Ирска можеби ќе побара поддршка од фондот за помош на ЕУ, ако не и‘ е потребна? Тоа е можеби поради другите земји-членки со заслабната економија, како Португалија и Шпанија. На владите во Лисабон и Мадрид им е јасно дека нема да привлекуваат толкаво внимание, ако Ирска побара помош од фондот на ЕУ. Портпаролот на ЕК неуморно повторува колку е мала веројатноста дека ќе треба да се спаси Ирска, но за такви случаи Европската унија уште од мај годинава оформи фонд за помош. ЕУ располага со неопходните финансиски средства, и може да гарантира сигурност, истакнува Алтафај.

Автор: Кристоф Хаселбах / Јасна Мушиќ Јанчулева

Редактор: Жана Ацеска