واشنگټن افغانستان ته د ناټو د ۱۰۰۰ نورو سرتیرو استول غواړي
۱۳۹۶ مهر ۱۳, پنجشنبه
په ناټو کې د امریکا متحده ایالاتو نوي استازې کي بیلي هاچیسون، ویلي دي چې د ناټو د غړو هیوادونو دغه سرتیري به د متحده ایالاتو د ۳۰۰۰ نویو سرتیرو تر څنگ د طالب او نورو یاغیانو ضد جگړه کې له افغان امینتي ځواکونو څخه ملاتړ وکړي.
له دې مخکې د ناټو چارواکو اعلان کړی وو چې د دغه سازمان ۱۵ غړو افغانستان ته د نویو سرتیرو د استولو له پاره چمتوالی ښودلی دی، خو د هغوی د شمیر په هکله جزئیات بربنډ شوي نه وو.
هاچیسون یادونه وکړه چې متحده ایالات د ناټو د نورو اضافی سرتیرو په غوښتنه کې «پوره دقت» کړی دی. د متحده ایالاتو په نظر په افغانستان کې هغو سرتیرو ته اړتیا لیدله کیږي چې «ځانګړي ظرفیتونه» ولري.
د ناټو عمومي منشي ینس ستولتنبرگ، په جولای کې د افغانستان د کوماندويی ځواکونو، هوایي ځواک او په پوځي اکادمیو کي د افغان سرتیرو رزول په افغانستان کې د ناټو روان ماموریت مهمه برخه وگڼله.
د ناټو یوه استازي ویلي دي چې په اوسني وخت کې په افغانستان کې د ناټو د حضور د لا پیاوړي کولو له پاره خبرې روانې دي او د اکتوبر په میاشت کې به دغه خبرې د کارپوهانو په سطح دوام پیدا کړي. په پام کې ده چې په نومبر میاشتې کې د ناټو د دفاع وزیرانو په غونډه کې پر دغې موضوع هم بحث وشي.
د امریکا متحده ایالاتو ولسمشر په افغانستان کې د واشنگټن د نوې ستراتیژی له اعلانولو سره دغه هیواد ته د اضاافي سرتیرو د استولو له پاره لاره هواره کړه. له دې سره به څه د پاسه ۳۰۰۰ نوي امریکايی سرتیري په افغانستان کې له اوسني ۱۱ زرو سرتیرو سره یو ځاي شي.