آيا د ورکي سوي الوتکي ټوټې پيدا سوي دي؟
۱۳۹۲ اسفند ۲۹, پنجشنبه
داسي ښکاري چي استراليا دي د ماليزيا د ورکي سوي مسافروړونکي الوتکي ټوټې پيدا کړي وي. د دغه هيواد لومړي وزير توني ابوت، د پنجشنبې په ورځ (۲۰۱۴ کال د مارچ ۲۰) پارلمان ته د سټيلايټ له خوا اخيستل سوو «معتبرو» انځورونو په اړه خبر ور کړ. د هغه په خبره دغه ټوټې چي په اوبو کي موندل سوي دي کېدای سي چي د ماليزيا د ورکي سوي الوتکي وي. هغه په دې اړه نور معلومات ور نه کړل.
د ماليزيا يوه مسافر وړونکې الوتکه چي ۲۳۹ مسافر پکښې سپاره ول د مارچ مياشتي پر ۸ نېټه د دغه هيواد له کوالالمپور څخه د پيکينگ پر لور والوتل او له هغې ورځي راهيسي تری تم ده. په دغه الوتکي پسي د لټون په نړيوال ماموريت کي استراليا د هند اقيانوس د جنوبي برخي د لټون مسئوليت پرغاړه اخيستی دی.
د استراليا لومړي وزير ويلي دي چي د ماليزيا لومړي وزير نجيب رازق ته يې په دې اړه معلومات ورکړي دي. خو هغه خبر داری ورکړ چي د سټلايټ په مرسته کشف سوي دوې ټوټې تر اوسه پوري پېژندل سوي نه دي. د هغه په خبره د دوغو دوو ټوټو پيدا کول هم کېدای سي ډېر «ستونزمن» وي.
ماليزيا له FBI هم مرسته غوښتې
د ماليزيا حکومت د امريکا متحده ايالاتو له فدرالي پوليسو څخه د ورکي سوي الوتکي په پلټونو کي مرسته غوښتې وه. د امريکا له فدرالي پوليسو څخه غوښتل سوي ول چي د الوتکي تمثلي الوتنه دي چي د ورکي سوي الوتکي د کپيتان احمد شاه په کور کي موندل سوې وه وڅېړي.
ويل کيږي چي نه يوازي د الوتکي د کپيتان، بلکي د هغه د مرستيال عبدالحميد په کور کي هم د الوتکي تمثلي الوتنه موندل سوې ده. ويل کيږي چي د الوتکي ارتباطي سيستم قصدي گل سوی وو او د پرواز مسير ته تغير ورکړل سوی دی چي دغه کار پيلوټان تر پوښتني لاندي راولي.
د امريکا جمهور رئيس بارک اوباما له يوه تلويزيون سره په مرکه کي ويلي دي چي په ورکه سوي الوتکي پسي لټون «تر ټولو لومړيتوب لري.» هغه زياته کړې ده چي د ماليزيا له حکومت سره نژدې همکارۍ دوام لري.