ايساف: د کابل په بريد کي مو ۶ تنه وژل سوي دي
۱۳۹۲ اردیبهشت ۲۶, پنجشنبه
په کابل کی د آيساف ځواکونو له خوا په يوه خپره سوې وينا پاڼه کي راغلي دي، چي ۲ تنه عسکر او ۴ تنه ملکي قرارداديان يې وژل سوي دي، خو د هغوی د ملت په اړه ئې څه نه دي ويلي.
تر دې دمخه د افغانستان د روغتيا وزارت چارواکو ويلي ول، چي د کابل په ځانمرگي بريد کي ۶ تنه وژل سوي او نزدې ۳۷ تنه ملکي وگړي نور ټپيان سوي دي. اوس وروستي راپورونه وايي، چي دوه تنه نور هم وژل سوي دي چي په دې سره د وژل سوو ملکي وگړو شمېر ۸ تنه سو. بريد د بهرنيانو د موټر پريوه کاروان ترسره سوي. د بريد پړه حزب اسلامي پرغاړه اخيستې ده.
د کابل امنيې قوماندان ايوب سالنگي رويترز خبري آژانس ته ويلي دي چي د يوه کرولا ډوله موټر په واسطه د پنجشنې په سهار د کابل په شاه شهيد سيمه کي د بهرنيانو د موټرو پريوه کاروان بريد ترسره سوي دئ او په سيمه کي ئې سخت زيان اړولی دئ.
د بهرنيانو د تلفاتو په اړه تراوسه معلومات نسته خو د افغانستان د عامي روغتيا وزارت يوه وياند ويلي دي، چي تر اوسه پوري شپږ تنه ملکي وگړي وژل سوي دي او ۳۷ تنه نور ټپيان دي. ويل کيږي، چي په ټپيانو کي د يو شمېر روغتيايي حالت د اندېښنې وړ دئ.
په کابل کي د آيساف ځواکونو يوه وياند پيښه تائيد کړې ده خو د مرگ ژوبلي په اړه ئې معلومات نه دي ورکړي.
د بريد پړه په افغانستان کي د حزب اسلامي ډلي پرغاړه اخيستې ده او ويلي ئې دي چي دا ئې له يوې اوونې راهيسي پلان کړې وو او هدف ئې د امريکايي مشاورينو له منځه وړل ول.
د دغي ډلي يوه وياند هارون زرغون رويترز خبري آژانس ته د تليفون پر کرښه ويلي دي چي په بريد کي يې ۱۲ تنه امريکايي وگړي وژلي دي.
د عيني شاهدانو په حواله چاودنه دومره پياوړې وه چي نزدې کورونه ئې سخت زيانمن کړي دي. يو تن چي خپل نوم مصطفي ښوولی دی فرانسې خبري آژانس ته ويلي دي، چي د چاودني پرمهال په کور کي وو او د کور ټولي هنداري ئې ماتي سوې.
د هغه په خبره تر چاودني وروسته ډير ژر دباندي را ووتلم چي خپل ورور او خور له ښوونځي څخه راولم، پرلاره مي وليدل چي څو خلک په وينو لړلي پوليسو په خپلو موټرو کي انتقالول.
دا په تيرو دوو مياشتو کي تر ټولو خونړۍ بريد دئ چي په کابل کي ترسره کيږي. تر دې دمخه د وران کال د مارچ په مياشت کي د افغانستان د دفاع وزارت دروازې ته نژدې يو بريد ترسره سوی وو.
په دغه وخت کي د امريکا د دفاع وزير چاک هېگل هم په افغانستان کي له افغان چارواکو سره په خبرو اترو بوخت وو.