د ایتالیا په لور د مهاجرو یو نوې څپه په لارې ده
۱۳۹۴ خرداد ۱۷, یکشنبه
د آلمان اوایتالیا په شمول د ژغورنې نړیوالو ځواکونو د شنبه او یکشنبه په ورځو څه ناڅه ۳۵۰۰ مهاجر د مدیترانې په سمندرگي کې ژغورلي دي. ویل شوي دي چې دغه مهاجر په کوچنیو بیړیو کې د لیبیا له سواحلو څخه خوځیدلي ؤ او د ژغورنې په ۱۵ عملیاتو کې وژغورل شول. په دغو عملیاتو کې د آلمان دوه ژغورنکو بیړیو «هسن» او «برلین» هم برخه درلوده. د آلمان د دفاع وزارت د وینا له مخې هغوی وتوانیدل چې له څلور کوچنیو بیړیو څخه ۱۴۱۱ کډوال چې په هغو کې ۱۴۵ ماشومان شامل ؤ، وژغوري. دغو آلماني بیړیو ته په روم کې د سمندري ژغورنې د مرکز MRCC له خوا خبر ورکړی شوی ؤ.
د قاچاق وړونکو پر ضد نور زیات عملیات
د ژغورنې په عملیاتو کې د بریتانیا جنگي بیړې، HMS Bulwark هم گډون درلود. د بیړۍ کیپتان ، نیک کوک پریست، خبریالانو ته وویل:«ټولې نښې نښانې پر دې شهادت ورکوي چې د لیبیا په سواحلو کې ۴۵۰ زرو تر ۵۰۰ زرو پورې کډوال چې ډيري یې له شمالي افریقا څخه دي، انتظار باسی چې د مدیترانې له لارې ایتالیا ته ورسیږي.»
د بریتانیا د دفاع وزیر، مایکل فالن له اروپا څخه وغوښتل چې د قاچاق وړنکو پر ضد نور زیات عملیات په لاره واچوي: «مونږ باید هڅه وکړو چې د هغوی مالي سرچینې وچې کړو.» هغه یادونه وکړه چې دغه خلک د مهاجرو په درد او رنځ سره پیسی گټي.
د مدیترانې د ماموریت لومړی پړاو
د مدیترانې له ماموریت سره د اروپا اتحادیه غواړي چې د کډوالو د قاچاق مخه ونیسي. د اروپا د اتحادېې غړو هیوادونو د مې په میاشت کې يو پلان تصویب کړ چې د هغه له مخې د قاچاق وړنکو پر ضد عمل وشي. په لومړي پړاو کې باید بیړې او کشافي الوتکې د قاچاق وړونکو د شبکو په هکله معلومات راټول کړي. د دی لپاره چې د قاچاق وړونکو د بیړیو پر ضد عمل وشی او د دې لپاره چې دغه بیړې ویجاړې کړای شي، پوځې اقداماتو ته اړتیا ده. خو د اروپا اتحادیه باید د دی هدف لپاره د ملگرو ملتو او لیبیا څخه اجازه واخلي.