د روزگان د امنيې قوماندان په کابل کي ووژل سو
۱۳۹۳ اسفند ۲۸, پنجشنبه
د روزګان د سرپرست والي ویاند دوست محمد نایاب دويچه ويله پښتو ته وویل چي مطيع الله خان تیره شپه د کابل ولایت په شپږمه ناحیه کي پلی روان و، چي د شا له خوا د يوې ښځي له خوا په ځانمر برید کي وژل سوی دی.
نایاب وايي دغه معلومات په سیمه کي نږدې د يوه شخصي هوټل له پټو کامرو څخه تر لاسه سوي دي.
د روزګان د والي ویاند وايي، د مطیع الله خان وژل به د دغه ولایت پر امنیتي وضعیت هم منفي اغیز وکړي. د هغه په خبره د مطیع الله تر قومندان کیدو مخکي په روزګان ولایت کي د څلورو هیوادونو هالینډ، امریکا، ایټالیا او اسټرلیا عسکر موجود ول، لیکن بیاهم ناامني د ښار څنډو ته رارسيدلې وه.
ناياب وويل، کله چي مطيع الله د امنيې قوماندان سو د روزگان ولايت تر نیوي سلنه زیاته برخه د حکومت تر واک لاندي سوه.
ویل کیږي، چي د هغه جنازه به سبا جمعه له کابل څخه روزګان ته انتقال او په خپل پلرني ټاټوبي تيري کي به ښخ سي.
مطیع الله خان له تیرو ۳ کالو راهیسي د روزګان امنیه قومندان او تر هغه دمخه د کندهار او روزګان د لويي لاري د ساتني مسئوليت لاره.
مطیع الله د قومندانۍ ترڅنګ په سیمه کي یو پیژندل سوي قومي مشر هم وو. د هغه د وژني مسئولیت وسله والو طالبانو منلی دی.