د غذایی رژیم او وزن د کمیدو په هکله گټوری لارښوونې

د پلاستیکی لوښو استعمال ته باید پام وسی. پلټنو ښودلې چی په هغو کی د "بیسفنول ای" (BPA) په نامه یو ډول کیمیاوي ترکیب موجود دی چی په بدن کی د هورمونو د بدلون او سرطان سبب گرځي. په بدن کی د بیسفنول زیاتیدل چاغښت رامنځته کوي.

د میوې اوبه د چاغښت سبب گرځي. که له یوې خوا په هغو کی ډیر ویټامینونه سته ، خو د بلی خوا بیا ډیره کالوري هم لري.یوې خبری ته باید پام ونیسي چی د تازې میوې ځای هیڅکله د میوې اوبه نه نیسي.

سترس یا د کار فشار د چاغښت سبب گرځي. کله چی یو څوک ډیر ستریس ولري نو د هغه بدن آدرنالین ترشح کوي چی دا کار د زړه د ضربان او وینی د فشار د لوړیدو باعث گرځي. په دې ډول نو د کورتیزول هورمون په بدن کی آزاد کیږي او همدغه کورتیزول بیا ډیره اشتها رامنځته کوي.

ځینی کسان بیا د شپې له خوا ډوډۍ نه خوري او یوازی اوبه چښي. مهمه خبره داده چی بدن باید ۱۴ ساعته استراحت وکړي او مجبور نه سي چی د خوب پر وخت ډوډۍ هضم کړي.

هغه کسان چی غواړی وزن یې کم سي باید هرومرو سپورت وکړي. که د سم سپورت له پاره کافي وخت نه لري نو کولای سي د ورځني عادی کار په جریان کی خپلو عضلاتو ته حرکت ورکړي او یا د مثال په ډول د زینو څخه پورته او کښته سي. ۲۰ دقیقې د زینو سپورت په بدن کی د ۱۰۰ کالوری د سوځولو سبب گرځي.

پروتین د بدن له پاره ډیر مهم دي او د وزن په کمولو کی مهم رول لوبوي . هغوی نه یوازی عضلې جوړوي بلکی بدن ته انرژي هم ورکوي . همدارنگه د کابوهایدراتو په مقایسه په بدن کی تر ډیره وخته پوری پاته وي او سړی موړ ساتي.

ځینی کسان لوږې او تندې ته په یوه سترگه گوري خو د اوبو چښل ډیر ضروري دي. په اوبو کی د لیمو اضافه کول که څه هم د وزن د کمیدو سبب نه گرځي خو بدن ته ویټامین C رسوي چی دا کار د بدن دفاعي سیستم تقویه کوي.

رنگونه هم د اشتها د له منځه وړلو سبب گرځي. علمی څېړنو ښوولې چی ژیړ ، نارنجی او سره رنگونه اشتها تحریکوي او شنه او زرغونه رنگونه بیا هغه راکموي.

ځینی داسي غذایی مواد هم سته چی حجم یې ډیر وي خو کالوری یې کمه وي.هندوانه د هغو میوو څخه شمیرل کیږي چی ډیرې اوبه او کمه شیریني لري. له همدې کبله هندوانه د اشتها په کمولو کی مهم نقش درلودای سي.

د خوشحالۍ او رضایت د رامنځته کولو هورمونونه هم د وزن په کمیدو کی خپل نقش لوبوي. په هغو غذایی موادو کی چی په زیاته پیمانه تریپتوفان او یو څه پروتئین موجود وي د سروتونین په نامه د خوښۍ هورمون په بدن کی ترشح کوي. په دې اړه خرما، اانځرو ، وچې میوې ،او ترخه کاکاو ته کولای سو اشاره وکړو.

ځینی روحي لارښوونی هم سته چی د وزن د کمیدو سبب گرځي. د مثال په ډول کله چی مو د خوږو شیانو خوړولو ته اشتها راسي ، نو یو څو څاڅکی عطر پر یوه دستمال ووهی او هغه بوی کړی.دا کار تر یوې اندازی پوری د اشتها د کمیدو سبب گرځي.

اوبه د اشتها په کمیدو کی مهم نقش لوبوي. پس له دې چی له خوبه پاڅیدلی او مخکی تر سبا ناری د اوبو چښل د اشتها د کمیدو سبب گرځي. همدارنگه نور وخت هم تر ډوډۍ دمخه د اوبو چښل ددې باعث کیږي چی سړی ډیرخوراک ونه کړي.