د مهاجرو د مخنیوي له پاره پر شوو اقداماتو نیوکه
۱۳۹۶ تیر ۱۳, سهشنبه
د آلمان، فرانسې او ایټالیې د کورنیو چارو وزیرانو د پاريس په غونډه کې د مدیترانې سمندرگي له لارې اروپا ته د راتلونکو مهاجرو د مخنیوي له پاره پر یو لړ اقداماتو موافقه کړې.
د دغې غونډې په ترڅ کې د هغو غیر دولتي سازمانونو په برخه کې هم د قوانینو سختولو پریکړه وشوه، چې په مدیترانې سمندرگي کې د ژغورنې عملیات ترسره کوي.
په آلمان کې د مهاجرو د حقونو په برخه کې د فعال ټولنیز سازمان Pro Asyl مشر ګنتر بُکهارد، بیا د دغو پریکړو په غبرګون کې د نوموړو اروپایې هیوادونو پر حکومتونو سختې نیوکې کړي دي.
بُرکهارد ویلي دي چې د دغو هیوادونو حکومتونو«د مدتیرانې سمندرگي له لارې له لیبیا څخه اروپا ته د راتلونکو مهاجرو د مخنیوي له پاره په مدیترانې او د لیبیا په سویلي ساحل کې په اصطلاح دوه دویوالونه جوړول غواړي.»
د دغه ټولنیز سازمان مشر له فرانسې خبري آژانس سره په مرکه کې دا هم وویل چې دغه اروپایې هیوادونه د مهاجرت پر کړکیچ د سترګو پټولو کوښښ کوي.
نوموړي زیاته کړې ده «د اروپایې اتحادیې د رامنځته کیدو راهیسې دا د اروپا د پناهندګۍ پر سیستم تر ټولو لویه حمله ده.»
په ایټالیا کې د مدیترانې سمندرگي له مسیر څخه په پرله پسې ډول په ډیر لوی شمیر کې د مهاجرو تر راتګ وروسته د ایټالې حکومت ویلي وو چې اوس دغه هیواد د نورو مهاجرو جذبولو ظرفیت نه لري.
په همدې لړ کې د یکشنبې ورځې په ماښام (د جولای میاشتې ۲) د فرانسې په پلازمېنه پاريس کې د جرمني، فرانسې او ایټالیې د کورنیو چارو وزیرانو تر منځ خبرې اترې ترسره شوې.
په دغو خبرو اترو کې د اقتصادي دلایلو له امله اروپا ته د راغلو مهاجرو د اخراج بهیر ګړندي کولو ترڅنګ په مدیترانه کې د ژغورنکي ماموریت تر سره کونکو غیر دولتي سازمانونو له پاره د قوانینو پر سختولو هم موافقه رامنځته شوه.
سربیره پر دې له لیبیا څخه د مهاجرو د راتګ بندولو له پاره د یو شمیر اقداماتو د عملي کولو پریکړه شوې.
بُرکهارد پر دغو پریکړو د سختو نیوکو په ترڅ کې وویل چې د دغو اقداماتو هدف «د مهاجرو په بیه د اروپایې سرحدونو ساتنه او حفاظت کول» دي.
د مهاجرو د حقونو په برخه کې دغې فعالې ادارې ویلي دي چې له لیبیا څخه د مهاجرو د راتګ مخنیوي له کبله د ایریتریا او سومالیا په څیر هیوادونو خلک هم زیانمن کیږي، کوم چې د منل شویو مهاجرو په توګه په آلمان کې د پنا ترلاسه کولو مستحق دي.